АН-ын гишүүн Р.Амаржаргал Монгол Улсын Ерөнхийлөгчийн сунгаанд нам дотроо өрсөлдөнө гэдгээ зарлалаа. Тэрбээр энэхүү шийдвэрийг ихээхэн нухацтай бодож гаргаснаа нийтэд дуулгаж, төрийн хүнд ачааг нуруундаа үүрэх цаг нь болсон хэмээн мэдэгдээд байна.

Түүний хувьд Монгол Улсын 21 дэх Ерөнхий сайдаар ажиллаж байсан,  мөн Гадаад хэргийн сайд (тухайн үеийн), УИХ-ын гишүүн зэрэг төрийн өндөр дээд албан тушаалуудыг хашиж байсан, туршлагатай, тулхтай улстөрч юм.

АН-аас түүнээс өмнө Ц.Оюунгэрэл Монгол Улсын Ерөнхийлөгчид өрсөлдөхөө албан ёсоор зарласан. Ийнхүү өнөөдрийн байдлаар, АН-ын хоёр ч хүн Монгол Улсын Ерөнхийлөгчийн сонгуулийн нам доторх сунгаанд өрсөлдөхөө зарлаад байна.

Нөгөөтэйгүүр, АН Ерөнхийлөгчид нэр дэвшигчдэдээ тавих шалгуур, босгоо өндөрсгөөд байгаа юм.

Тодруулбал, "Монгол Улсын Ерөнхийлөгчид өмнө хуулийн шаардлага хангасан хүн нэр дэвшдэг байсан бол АН хуулийн шаардлага дотор  намынхаа үзэл санаа, зарчмыг шингээсэн гэдгийг АН-ын нарийн бичгийн дарга О Магнай мэдэгдсэн юм.

Мөн АН-аас Монгол Улсын Ерөнхийлөгчид нэр дэвшигч нь дараах зарчмыг баримталж ажиллах шаардлагыг тавьж байгаа аж. Нэгдүгээрт,  хувь хүний эрх, эрх чөлөөний эсрэг ямар нэгэн санал, санаачлага гаргахгүй. Хоёрдугаарт, хувийн өмчийн эсрэг үг үйлдэл, санал санаачилга гаргахгүй. Гуравдугаарт, 1992 оны Үндсэн хуулийн суурь үзэл санаа болох парламентын засаглалыг тууштай хамгаалагч байна. Дөрөвдүгээрт, цаазын ялыг эргэн сэргээх санал гаргахгүй. Тавдугаарт, улс төр, эдийн засгийн тусгаар тогтнолын баталгаа болсон гуравдагч хөршийн бодлогыг тууштай баримтлагч байна.

Цаашлаад нэр дэвшигчид тавих шаардлагын хувьд хууль бусаар хөрөнгөжөөгүй байхаас гадна орлогын эх үүсвэр нь тодорхой байна. Монгол туургатны эв нэгдлийг илэрхийлэгч, монгол бичгээ эрхэмлэн дээдэлдэг, хоёроос доошгүй гадаад хэлний мэдлэгтэй  байх ёстой гэсэн шаардлага тавьж байгаа.

Мөн Монгол Улсын Ерөнхийлөгчид АН-аас нэр дэвшигч нь дараах үүргийг хүлээнэ. Үүнд, нийгмийн сүлжээнд иргэдээ блок хийдэггүй байх, өдөр тутмын ажил болон гэр бүл нь ил тод буюу шилэн байна.

Мөн хүний эрхийн өндөр мэдрэмжтэй, сайн дурын үйл ажиллагааг ямагт дэмжигч байна. Ажлын албандаа хүйсийн тэнцвэртэй байдлыг тэгш хангах зарчмыг хатуу баримталдаг байх зэрэг шалгуур, босгыг тавьж байгаа аж.

У.Тэргэл