Монгол Ардын Хувьсгалт нам, Монгол Ардын намтай нэгдэж буйгаа хэдхэн хоногийн өмнө зарласан.

Тодруулбал, МАХН-ын дарга Н.Энхбаяр 2021 оны Ерөнхийлөгчийн сонгуульд МАН-аас нэр дэвшсэн хүнийг дэмжин ажиллана гэдгээ албан ёсоор зарласан.

Тэгвэл МАХН-аас УИХ-д сонгогдсон С.Ганбаатар гишүүн намынхаа гишүүнчлэлээс татгалзаж байгаагаа албан ёсоор мэдэгдлээ. Тэрбээр "2021 оны дөрөвдүгээр сарын 19-нд МАН, МАХН хоёр нэгдэж, хурлаа хийж байгаа өдөр. Энэ хоёр намын хуралд би хүндэтгэлтэй хандаж байна. Сайнхүү овогтой Ганбаатар миний бие 2017 оны тавдугаар сарын 16-нд МАХН-д элссэн.

Ингээд Монгол Улсын Үндсэн хууль, Улс төрийн намын тухай хуульд заасны дагуу МАХН-ын гишүүнчлэлээс өнөөдөр татгалзаж буйгаа албан ёсоор мэдэгдэж байна. Эрх баригчидтай хамтарч тэмцэж, ганцаардаж байхад хань болж байсан МАХН-ын журмын нөхөд, удирдлага, хамт олондоо сайн сайхныг хүсэж байна. Монголын баялгийг идэж байгаа МАН-тай би нэгдэх боломжгүй учраас ийм шийдвэр гаргаж байна. Эрдэнэтчүүд ард түмэнтэйгээ дэм болж, хулгайч дээрэмчидтэй тэмц гэж намайг дэмжсэн. УИХ дээр Эрдэнэтийн ард түмнийхээ дуу хоолойг хүргэх болно. Парламентад байгаа МАН-ын 62 суудлыг 63 болгох гэж Эрдэнэтийн ард түмэн надад санал өгөөгүй"  гэв.

Б.Баатар