Нэг угшилтай арваад жил явсан МАН, МАХН хоёр нэгдлээ. Энэ нэгдлийн дараа засаг төрд дахин хуваарилалт явагдана. МАХН-аас ирэгсэд засагт орж, зарим яам, агентлагийг авах нь тодорхой юм. Өөрөөр хэлбэл, улс төрийн уламжлалт хэллэгээр “тоосго” сугалж таарна. Л.Оюун-Эрдэнийн засаг бүрдэхэд олныг цочтол орж ирсэн сайд бол Ч.Номин.

Хэдийгээр үндсэн яам бус ч тусгаар яамтай болоод удаагүй энэ салбарынхан томоохон, дориухан сайдыг хүсч байв. Гэвч хувьдаа телевизтэй, дэлхийн шоунуудыг “оруулж ирдэг” гэхээс өөрөөр соёлын салбарт нэр ус бүдэгдүү Ч.Номин сайдаар томилогдчихсон.

Засгийн газар нь ажиллаж эхлээд бараг 100 хоночихлоо. Ч.Номин сайдын “контент” яаманд нь лав хэрэгжсэнгүй. Дуулдсангүй. Хэдий хүртэл сайд шиг сайд болохыг нь хүлээх вэ, бүү мэд. Ингэж л салбарынхан нь ярьж буй юм.

Дээрээс нь Ч.Номин сайдын аав Л.Чинбатын “Гацуурт” компани соёлын өв Ноён уулыг ухсан гэх мэдээлэл олны тархинд бүр суучихсан. Тэгж нийтээрээ үздэг. Энэ дүгнэлт намынх нь удирдлагуудын чихэнд ч хүрсэн бололтой.

Тиймээс Ерөнхийлөгчийн сонгуулийн дараа Засгийн газрын сайд нараас “тоосго” сугалахад Ч.Номин их дээгүүр бичигдчихээд байгаа гэж улс төрийн хүрээнд жиг жуг хийгээд эхэлсэн байна.

С.Сүлд