Ерөнхийлөгчийн сонгуулийн тухай хуулийн дагуу Монгол Улсын Ерөнхийлөгчид нэр дэвшигчдийн материалаа намууд өнөөдөр Сонгуулийн ерөнхий хороонд бүрдүүлж өгч байгаа. Гэвч АН-аас нэр дэвшигч Н.Алтанхуягийн материалыг Сонгуулийн ерөнхий хороо хүлээж авахгүй, хууль зөрчсөн тул УИХ-ын АН-ын бүлгийн гишүүд асуудлаа шийдүүлэхээр яг одоо хүлээж байна.

Учир нь, Сонгуулийн ерөнхий хороо бүрэн бүрэлдэхүүнээрээ асуудлыг шийдвэрлэх хуультай. Гэтэл СЕХ-ны гишүүд хоёр хуваагдчихаад хуулийг дур зоргоороо тайлбарлаж, хууль зөрчиж байгаа аж. Сая л гэхэд нэр дэвшигч Н.Алтанхуягийн материалыг хүлээж авахгүй талаар дөрвөн гишүүн нь мэдээлэл өгсөн юм.

Харин энэ асуудлаар АН-ын гишүүн, УИХ-ын гишүүн Ж.Батсуурь хэлэхдээ, “Үндсэн хуульд зааснаар УИХ-д суудалтай, нам эвсэл Ерөнхийлөгчийн сонгуульд нэр дэвшүүлдэг. Энэ дагуу УИХ-д 13 суудалтай АН-ын бүлгийн 13 гишүүн гарын үсэг зурж, Үндэсний бодлогын хорооны олонхийн шийдвэр, АН-ын Их хурлын гишүүдийн саналаар нэр дэвшигчээр тодорсон Н.Алтанхуягийн материал, мөрийн хөтөлбөрийг Үндэсний аудитын газраар хянуулаад хүлээлгэж өгөх гэсэн боловч СЕХ хүлээж авахгүй байна.

Энэ бол улс төрийн зорилготой, хууль зөрчсөн асуудал. Иймд АН-ын гишүүд асуудлыг шийдвэрлүүлэхээр хүлээж байна” гэв.

С.Сүлд