УИХ-ын чуулганы өнөөдрийн хуралдаанаар Эх, олон хүүхэдтэй өрх толгойлсон эх, эцэгт тэтгэмж олгох тухай хуульд нэмэлт, өөрчлөлт оруулах тухай хуулийн төслийн эцсийн хэлэлцүүлгийг баталлаа. Хуулийн төслийг УИХ-ын гишүүн Ц.Туваан танилцуулсан ба төгсгөлд нь тэрбээр "Монгол Улсад хүний эрхийг ноцтойгоор зөрчиж байна. УИХ-ын гишүүн Ш.Адьшаагийн гарыг мушгилаа. А.Адъяасүрэн эмэгтэй гишүүн дэвсэх дэвсгэргүй өлсгөлөн зарлаад хэвтэж байгаа шүү. Монгол Улсад нэг намын дарангуйлал удахгүй сөнөх болно" гэлээ.

УИХ-ын дарга Г.Занданшатар хариуд нь “Төрийн эрх барих дээд байгууллага УИХ бол хууль тогтоох, хуулийн хэрэгжилтийг хянах үндсэн чиг үүрэгтэй байгууллага. Энэ хүрээнд УИХ-ын гишүүд хууль санаачлах, хууль тогтоох бүрэн эрхтэй. Харин УИХ-ын индрийг намынхаа дотоод зөрчилтэй хольж болохгүй. Өлсгөлөн зарлаж, хууль дээдлэх ёсыг зөрчүүлэх гэж санаархаж байгаа нь Үндсэн хуулийн зөрчил юм. Хуулийг өөрсдийн явцуу эрх ашиг, бусармаг үйлдэл, явуургүй санаархалдаа нийцүүлэх эрх хэнд ч байхгүй. Та бүхэн үүнийгээ боль.

Намынхаа дотоод зөрчлийг Монголын төрд нялзааж, хууль зөрчихийг шаардаж, ард түмнийг эмх замбараагүй байдал руу түлхэхийг шаардаж байгаа энэ үйлдлээ нэн даруй зогсоохыг Ц.Туваан дарга танаас шаардаж байна. Ардчилсан нам эрх мэдлээ булаацалдаж, албан тушаалын төлөө өлсгөлөн зарлаж байхын оронд дотроо учраа ол. Намынхаа бузар булай бульхайг дотроо шийдэж, намаа шинэчил. Энэ асуудлыг чинь УИХ шийдэж өгөхгүй” хэмээн хатуухан шүүмжлэв. 

Харин Ц.Туваан гишүүн өлсгөлөнгөө үргэлжлүүлэхээр хуралдааныг орхиж гарсан юм.

У.Тэргэл