Ерөнхийлөгчийн сонгуульд Ардчилсан намаас нэр дэвшсэн УИХ-ын гишүүн Н.Алтанхуягийг Сонгуулийн ерөнхий хороо бүртгэж авахаас татгалзсан. Ингэхдээ Ардчилсан намыг дотооддоо асуудлаа шийдэж, аль нэг нэр дэвшигчийг Сонгуулийн ерөнхий хороонд бүртгүүлэхийг зөвлөсөн ч өчигдөр шөнө С.Эрдэнийн материалыг хүлээн авсан юм.

Дээрх асуудлаас үүдэж, УИХ дахь Ардчилсан намын долоон гишүүн өлсгөлөн зарласан. Тодруулбал, Н.Алтанхуяг, Ц.Туваан, Ж.Батсуурь, О.Цогтгэрэл, Н.Ганибал, С.Ганбаатар, А.Адъяасүрэн нар Төв талбайд өлсгөлөн зарлаад байгаа. 

Гишүүдийн тэмцэл эхэлсэн цагаасаа цагдаагийн байгууллагын хамгаалалттай нүүр тулж, өнгөрсөн шөнө тэд хүйтэн шалан дээр хоносон. Өлсгөлөн зарлаж буй гишүүд дороо дэвсэх эсгийг  талбай руу авч орох гэсэн ч цагдаа нар  дотогш нэвтрүүлээгүй. Зөвхөн зузаан хувцас, хэдэн мешокоос өөр зүйл тэдэнд хялайлгаагүй.

Өдгөө ч талбай руу хүн нэвтрүүлэхгүй байгаа бөгөөд сэтгүүлчдийг ч оруулж, мэдээлэл авахуулахгүй байгаа юм. Харин өлсгөлөн зарлаж буй гишүүд өөрсдийн цахим хуудсаараа дамжуулан мэдээлэл өглөө.

УИХ-ын гишүүн Н.Алтанхуяг “Өлсгөлөн зарлаж байгаа гишүүд дороо нэг жаахан зүйл дэвссэн болоод хонолоо. Ц.Туваан, Ж.Батсуурь гишүүн хоёр чуулганы нэгдсэн хуралдаанд оролцохоор Ордон руу орсон.

МАН-ын удирдах зөвлөлийн гишүүн Ч.Хүрэлбаатар “Ерөнхийлөгчийн сонгуульд хэн, хэн нэр дэвшихийг урьдчилаад мэдээлсэн байсан. Сонгууль гэдэг зүйлийг алга болгож, өрсөлдөгчөө захиалдаг болж байгаад харамсаж байна. Нью-Йоркийн шүүх дээр хэрэг илрэх гэхээр гэнэт Ерөнхийлөгчийн албан тушаалыг авах нь зүйтэй юм гээд бүлэглэн дайрч байна. Сайн цаг сууж байхад бус тэмцэж байж ирдэг юм. Удахгүй бүх зүйл сайхан болж, сайн цаг ирэх байх гэж найдаж байна. Өнөөдөр Сүхбаатарын талбайг хэдэн ч давхар бүсэлчихээд байгаа юм. Энэ бол үнэхээр буруу жишиг юм шүү” гэлээ.

УИХ-ын гишүүн С.Ганбаатар “Монголчуудын ардаар засаглах тогтолцоо нэг хүнээр засаглах тогтолцоогоор солигдож болохгүй. МАН-ын даргын халаасанд СЕХ, Дээд шүүх, УИХ тэр чигтээ багтсан гунигтай нөхцөл байдал үүссэн учир ард түмнээсээ дэмжлэг авахаас өөр сонголт байсангүй. Бид ард түмнээсээ ялуулаад өгөөч гэж гуйгаагүй. Зөвхөн иргэдийг сонголтоо хийх боломжийг шударгаар олгож өгөөч хэмээн тэмцэж байгаа. МАН У.Хүрэлсүхийг л зөвхөн сонгуулахын тулд СЕХ, Дээд шүүх нь хамтраад бүлэглэсэн дээрэм хийж байна. Үүнийг зогсоохын тулд хуулиар олгосон эрх хэмжээнийхээ хүрээнд тэмцэл хийж байна. Сөрөг хүчнийх нь 13 гишүүн талбай дээрээ гараад тэмцэл хийж байна гэдгийг эрх биш ойлгох болов уу” хэмээлээ.   

Төв талбай дээр өлсгөлөн зарлаж байгаа гишүүдэд дулаан эсгий, гудас хэрэглэхийг хориглож, талбай руу нэвтрүүлэхгүй байгаа нь хүний эрхийг зөрчиж байгаа хэрэг гэдгийг хэлэх хүн олон байна. Үнэхээр цаг агаарын таагүй уур амьсгалтай байгаа энэ үед өлсгөлөн зарлаж буй гишүүдийн эрүүл мэнд, амь насанд ямар нэгэн эрсдэл үүсвэл хариуцлагыг нь хэн хүлээх вэ. Хүний эрхэнд намын харьяалал хамаатай юу гэдэг асуулт хариултаа нэхэж байна.

Мөн сэтгүүлчдийн мэдээлэл авах боломжийг хязгаарлаж байгаа нь хүний эрхийн ноцтой зөрчил юм. Ямартай ч, Төв талбай дээр үүсээд буй нөхцөл байдалд Хүний эрхийн үндэсний комиссын гишүүд анхаарал хандуулж, хүний эрхийг дээдлэхийг олон нийт хүсэж байна.

Б.Баатар