Ерөнхийлөгчийн сонгуульд нэр дэвшсэн С.Эрдэнэ мэдээлэл хийлээ. 

Тэрбээр “АН-ын Үндсэн дүрэмд АН-ын дэд даргын гүйцэтгэх чиг үүрэг гэж бий. Энэ үүргийг гүйцэтгээгүйгээс АН-ын удирдлагын түвшинд асуудал үүссэн. Миний бие өнгөрсөн оны арванхоёрдугаар сар хүртэл ажиглаж суусан. Улмаар АН-ын даргын хувьд өгсөн чиг үүргийг хэрэгжүүлээгүй учраас үүрэгт ажилдаа эргэж орсон. Хоёрдугаарт, Улсын Дээд шүүх дээр бүх зүйл миний нэр дээр байсан. Энэ утгаар үүрэгт ажилдаа орж дүрмийн бус үйл ажиллагааг арилгахаар ажилласан.

Миний хувьд хууль эрх зүйн чадамж буюу Улсын Дээд шүүхийн гэрчилгээ, эрх зүйн бүхий л акт надад байсан. Удаа дараа энэ талаар мэдэгдсэн. Харамсалтай нь олуулаа байвал хууль дүрэмгүй аашилж болох нөхцөл байдал бий болсон.  

Өнөөдөр АН-ын үйл ажиллагаа тодорхой эрх мэдэлтнүүдийн дүрмийн бус үйл ажиллагаанаас болоод сатсан. Би өнгөрсөн оны сонгуулийн үр дүнг өөрөөр харж байгаа. Намаа ялуулаагүй учраас тайлбар хийдэггүй байсан юм. Өнгөрсөн он сонгууль бол луйврын сонгууль болсон. Аливаа нам бол үзэл санаа, үнэт зүйл дээр оршдог. Хэн нэгний эрх ашгийн төлөө үйл ажиллагаа явуулдаг гэж бодохгүй байна. дуртайдаа намаа орхиж гарчихаад, намаа самарчихаад би намын дарга, зүтгэлтэн байсан гэж хэлдэг улстөрч байж болохгүй. Аливаа юм хууль дүрмийн дагуу байх ёстой.

АН баруун төвийн үзэл, хүний эрх, эрх чөлөөг дээдэлдэг.

Ерөнхийлөгчийн сонгуульд нэр дэвших асуудал өчигдөр Сонгуулийн ерөнхий хороонд албан ёсны бүртгэлийн хугацаа дууссан. Миний хувьд анхнаасаа нэр дэвших бодол байгаагүй. Гэхдээ АН-ын 200 мянган гишүүний хувь заяатай холбоотой асуудлаар нэрээ дэвшүүлье гэж бодсон юм. АН-ын гишүүдийн хувь заяагаар тоглочихоод манай намын нэр дээр нэрээ дэвшүүлсэн нь намайг ийм шийдвэр гаргахад хүргэсэн юм" гэлээ.

А.Сүх