Монгол Улсын Ерөнхийлөгчийн сонгуульд нэр дэвшигчийн материалыг хүлээж авах эсэх асуудалтай холбоотойгоор улс төр нэлээд бужигнаж буй. Уг асуудлаар МАН-ын ерөнхий нарийн бичгийн дарга Д.Амарбаясгалан байр сууриа илэрхийллээ.

Тэрбээр "Өөрийн бурууд бүдэрвэл, хүний зөвд уйлдаггүй" гэдэг үг байдаг. Эхлээд нам дотроо эв нэгдлээ хангаж, дотоод асуудлаа шийдэж, Монгол Улсын үндсэн хууль, Ерөнхийлөгчийн сонгуулийн тухай хууль зэрэг бусад дагаж мөрдөгдөх хуулиудыг чанад мөрдөж сурах шаардлагатай.

УИХ-ын гишүүн Н.Алтанхуяг тэргүүтэй хүмүүсийг би багаасаа л мэднэ. 30 жил улс төрд явчихаад яагаад өнөөдрийг хүртэл төлөвшдөггүй юм бэ гэж бодох хэмжээнд хүргэж байна. Монгол Улс хөгжмөөр байна. Монголын ард түмэн баян чинээлэг амьдрах хүсэл эрмэлзлэлтэй байна. Энэ бүхний саад тушаа болж, 30 жил явж ирчихээд өнөөдөр бас л шударга ёс гэдэг зүйлээ ярьчихсан явж байна.

Н.Алтанхуяг Ерөнхий сайд байхаараа шударга байдаг, биш болохоороо шударга биш болдог гэдэг ойлголт монголын төрд байж болохгүй. Би л дарга байвал бусад нь хамаагүй. Би л дарга биш бол бусад нь бүгд шударга бус гэж ярьж байгаа үйлдэл нь өөрөө их тааламжгүй зүйл гэж залуу хүний хувьд үзэж байна. Тиймээс энэ үйлдлийг таслан зогсоох ёстой. Хүн дарга болохын тулд эсвэл альваа улс төрийн намууд хоорондоо дотроо ойлголцоогүйн төлөө монголын төр, монголын ард түмэн зовж зүдэрдэг байж болохгүй. Зовох шалтгаан бидэнд мундаагүй. Түүнээс хэн нэгэн хүн дарга болоогүйгээс болоод зовж зүдрэх гэдэг асуудал ярьж болохгүй гэдгийг шууд хэлэх нь зүйтэй.

МАН өчигдөр намаас нэр дэвшигчээ бүртгүүлэхдээ нэг зүйлийг маш тодорхой хэлсэн. Монгол Улсын Ерөнхийлөгчийн сонгууль монголын ард түмний нүдэн дээр ил тод, будилаан маргаангүй, шударга явагдах ёстой гэдгээ илэрхийлсэн. Үүний төлөө намынхаа зүгээс шаардлагатай зүйлсээр хангахад бэлэн гэдгээ хэлсэн.

Монгол төрийн сонгууль тэр дундаа төрийн тэргүүнээ сонгох сонгууль ямар ч маргаангүй явах нь юу юунаас илүү чухал. Монгол Улсын Ерөнхийлөгчийн сонгууль болохоор хамгийн муу хүмүүс хоорондоо өрсөлддөг. Тэр дундаасаа нэг муу нь сонгогддог гэсэн ойлголтоосоо бид салах ёстой. Улс төрийн намууд энэ улс төрийн соёлгүй байдлаа таслан зогсоох ёстой. Төрийн тэргүүнээ сонгох энэ сонгууль төрөө дээдэлдэг ард түмэн илүү сайхан сэтгэгдэлтэйгээ сонгуулиа өгдөг байх ёстой. Үүний төлөө МАН хичээн ажиллах болно" гэлээ. 

Б.Баатар