Ерөнхий сайд Л.Оюун-Эрдэнэ "Эрдэнэт үйлдвэр" ТӨҮГ-т ажиллаж байна.

Тэрбээр энэ үеэр “Эрдэнэт үйлдвэр бол турж үхэх гэж байгаа саалийн үнээ биш гэдгийг та бүхэн өнгөрсөн хоёр жилийн хугацаанд нотолж чадсан. Монгол Улсын эдийн засгийн аравны нэгийг үүрдэг. Цаашид 60-70 жил ажтллах техник эдийн засгийн үндэслэлийг гаргаж чадсан.

Би энэ танхимд анх ирснээс хойш хоёр жилийн хугацаа өнгөрсөн байна. Тухайн үед У.Хүрэлсүхийн Засгийн газар Эрдэнэт үйлдвэрийг онцгой дэглэмд авч байсан. Энэ хугацаанд юу болох бол гэдгийг Монголчууд бүгдээрээ л харж байсан. үнэхээр турж үхэх гэж байгаа саалийн үнээ шиг амьсгал хураах болов уу, ирээдүйгээ авч явах чадалтай болов уу гэж байсан.

Хэрэв онцгой дэглэм тогтоогүй бол тухайн өдрөөс 48 цагийн дараа Эрдэнэтийн 49 хувь Сингапурт шилжих байсан.

2016 он 183.7 тэрбум төгрөг улсын төсөвт төвлөрүүлж байсан бол 2019 онд 961.8 гаруй тэрбум, 2020 онд нэг их наяд төгрөг төвлөрүүлж чадсан. Мөн цар тахлын амаргүй нөхцөл байдалтай дэлхий нийт нүүр тулсан. Эрдэнэт үйлдвэр ийм боломжтой ажилласан учраас цар тахлын үед 650 тэрбумыг нийгмийн хаиуцлагын хүрээнд иргэд, ААН-ийн дулаан, цахилгааны үнийг төлж чадсан. Үүнийг хийж чадаагүй бол хамгийн багадаа 95 мянга, хамгийн ихдээ 250-260 мянган ажлын байр устах байсан. Тиймээс энэ ажлын байрыг хамгаалж чадсаных нь төлөө талархаж байгаагаа илэрхийлье.

Баялгийг зөв менежментээр авч явж чадвал нийт иргэд хүртэж болдог. Хамгийн хүнд цагт байгалийн баялагтаа найдаж болдгийг мэдэрсэн болов уу.

Цаашид Үндэсний баялгийн сангаар дамжуулж баялгийнхаа өгөөжийг хуваарилж чаддаг байх энэ зүйл рүү ирэх гурван жилд шилжих болно. Ингэж чадвал богино хугацаанд иргэдийнхээ амьдралыг сайжруулж, нэмүүн өртөг нэмэгдүүлэх боломжтой гэж үзэж байна. Өнөөдөр би та бүхэнд Засгийн газрын 129 дүгээр тогтоолыг танилцуулах гэж ирсэн юм. Бид зэсээ баяжуулдаг байх учиртай. Нүүрсээ угааж нэмүүн өртөг шингээж, алтаа цэвэршүүлдэг байх ёстой. Газрын доорх баялгаа нэмүүн өртөг шингээж байж гаргадаг байх ёстой. Монгол Улс дэлхийн түүхий эд худалдан авдаг цэг биш бүтээгдэхүүн боловсруулдаг өрсөлдөгч байх ёстой. Ийм стратеги руу уул уурхай явна" гэлээ

Б.Лхам