Ерөнхийлөгчийн 2021 оны сонгууль зургадугаар сарын 9-нд товлогдсон. Энэ дагуу Сонгуулийн ерөнхий хороо нэр дэвшигчдийн материалтай танилцаж, Ерөнхийлөгчийн сонгуулийн тухай хуулийн 28 дугаар зүйлийн 28.7-т заасны дагуу нэр дэвшигчийн үнэмлэхийг санал авах өдрөөс 16 хоногийн өмнө нэг өдөр олгож, нийтэд мэдээлнэ. Энэ өдрөөс сонгуулийн албан ёсны сурталчилгааны өдөр эхлэх юм.

Энэ удаагийн сонгуульд парламентад суудалтай гурван нам нэр дэвшигчээ дэвшүүлж, өрсөлдүүлэх ч АН-аас С.Эрдэнэ, Н.Алтанхуяг гэх хоёр хүний материал ирүүлснийг Сонгуулийн ерөнхий хороо холбогдох материалыг харгалзан С.Эрдэнийг шаардлага хангаж байна хэмээн үзэж бүртгэсэн. Гэвч эсрэг тал нь уг шийдвэрийг хүлээн зөвшөөрөөгүйгээс гадна С.Эрдэнийн нэр дэвшсэн нь хууль ёсных мөн үү гэдэг асуудалтай тулсан учраас шүүхийн эцсийн шийдийг хүлээж байа.

Өөрөөр хэлбэл, С.Эрдэнийн талд байгаа тамга хүчинтэй юу, эсвэл Ц.Тувааны талынх уу гэдгийг.

Өмнө нь хоёр ч удаа хойшилсон АН-ын хувь заяаг шийдэх шүүх хурал яг одоо хуралдаж байна. Хэргийг эргэн сануулахад, Улсын бүртгэлийн ерөнхий газраас 2020 оны арванхоёрдугаар сарын 25-нд С.Эрдэнэд АН-ын тамгыг шинээр олгосон шийдвэрийг энэ оны хоёрдугаар сарын 2-нд нийслэлийн Захиргааны хэргийн анхан шатны шүүхийн шүүгч захирамж гаргаж түдгэлзүүлсэн юм. Уг шийдвэрийг С.Эрдэнэ эсэргүүцэн гомдол гаргасан байдаг. Хэрэв давж заалдах шатны шүүхээс анхан шатны шүүхийн шийдвэрийг хэвээр үлдээвэл С.Эрдэнэ хууль ёсны нэр дэвшигч биш болж таарах нь.

Гэхдээ Сонгуулийн ерөнхий хороо нэр дэвшигчдээ үнэмлэхээ гардуулж баталгаажуулахад ердөө долоо хоног үлдсэн. Шүүх хурал хойшилбол нөгөө талд боломж үлдэхгүй гэсэн үг шүү дээ. Ер нь явж явж С.Эрдэнэ л албан ёсны нэр дэвшигч болж үнэмлэхээ гардаж, өрсөлдөж таарах тийм л дүр зураг харагдаж байна.

А.Сүх