Монгол Ардын намын дүрэмд Ерөнхий сайд МАН-ын дарга байна хэмээн заасан байдаг. Гэтэл Ерөнхий сайд асан У.Хүрэлсүх өнгөрсөн нэгдүгээр сард албан тушаалаасаа бууснаас хойш даруй дөрвөн сар орчмын хугацаа өнгөрчээ. Гэтэл өнөөдрийг хүртэл “тахим”-аа өгөхгүй гүрийж байгаагийн учир юу вэ.

Мэдээж МАН-ын дарга гэдэг томоохон албан тушаалтайгаа Монгол Улсын Ерөнхийлөгчийн сонгуульд оролцвол жин дарах нь тодорхой. Харин Ерөнхий сайд Л.Оюун-Эрдэнэ ихээхэн хүлээцтэй хандаж байгаа ч саяхан Засгийн газрынхаа 100 хоногийн ажлаа тайлагнах үеэрээ үгээ дайгаад амжсан.

Тэрбээр “МАН-ын дүрэмд зааснаар Ерөнхий сайд намын дарга байх ёстой. Энэ дагуу асуудлыг ярина гэдэг итгэлтэй байгаа. Энэ нь Л.Оюун-Эрдэнэ гэдэг хүн намын дарга болох гээд байгаа асуудал биш. Энэ бол зарчмын асуудал гэж бодож байна. Миний хувьд Ерөнхий сайд заавал намын дарга байх ёстой гэж үзэж байгаа. Ялаа үүрвэл ямбаа ч эдлэх ёстой” хэмээсэн билээ.

Энэ нь МАН-ын дарга дүрэм, журмаа мөрдөөрэй. Миний хувьд ялаа үүрч байгаа юм ямбаа ч эдэлье хэмээн шууд утгаараа хэлсэн хэрэг.  У.Хүрэлсүхийн хувьд ч өөрт нь дайж байгаа үг гэдгийг төвөггүй ойлгоно. Гэвч ямар нэгэн үйлдэл үзүүлэхгүй байгаа нь Монгол Улсын Ерөнхийлөгчийн сонгууль хүртэл гүрийхээрээ гүрийж, МАН-ын дарга гэсэн  албан тушаалтайгаа оролцох нь.

Тэгээд ч өнөөдрийг хүртэл түүнийг намын дүрмээ зөрчиж буйд буруутгах, шүүмжлэх хүн нэгээхэн ч алга. МАН-ын дарга бүхий л эрх мэдлийг гартаа төвлөрүүлдэг. Тиймдээ ч У.Хүрэлсүхийн хувьд  энэхүү албан тушаалаа зэвсэг болгон ашиглаж байна.

Харин тэрбээр санасандаа хүрч, сарвайснаа авсан цагтаа МАН-ын даргын албан тушаал, эрх мэдэл, ямбаа  дараагийн хүндээ өгсөн шиг өгнө гэдэгт найдъя.

У.Тэргэл