Сүүлийн үед Монголбанкны тэргүүн дэд ерөнхийлөгч Г.Дөлгөөн Сангийн яамны зохион байгуулж буй хэвлэлийн хурлуудад оролцож, Сангийн сайд Б.Жавхлантай хамт телевиз, сайт, олон нийтийн сүлжээгээр мэдээлэл, ярилцлага өгч, бодлого ярьж суудаг болсон талаар хэвлэлүүд бичиж, салбарынхан нь ярьдаг болжээ.

Засгийн газраас хэрэгжүүлж буй “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-ний хүрээнд ингээд явдаг болсон байгаа юм. Гэтэл Засгийн газрын энэ хөтөлбөрийн хэрэгжилтэд Монголбанк ямар эрх хэмжээтэй оролцохыг хуулиар заагаад өгчихсөн.

Өөрөөр хэлбэл, Монголбанк болоод Засгийн газар, тэр дундаа Сангийн яам хоорондын харилцаа Б.Жавхлан сайд, Г.Дөлгөөн тэргүүн дэд ерөнхийлөгч хоёрынхоос огт өөр юм. Цагтаа дарга цэрэг явсан, одоо ах дүү, найз нөхдийн гэмээр болсон харилцаагаараа дулдуйдаж хуулийг гууль болгох хориотой.

Ялангуяа Монгол Улс, дэлхий нийтээрээ эдийн засгийн маш хүнд сорилтын өмнө тулсан энэ үед Монголбанкны үйл ажиллагаа ийм “хөнгөмсөг” байж болохгүй. Тэгээд ч хуульд “Монголбанкны Ерөнхийлөгч Монголбанк болон банкны үйл ажиллагаатай холбогдох асуудлыг Засгийн газрын хуралдаанаар хэлэлцэхэд зөвлөх эрхтэй оролцож болно”, мөн “Засгийн газрын шийдвэр төрийн мөнгөний бодлогод харшилж байвал Монголбанк энэ талаар Засгийн газарт мэдэгдэнэ” гэж заасан.

Түүнчлэн Монголбанкны тухай хуулийн 31 дүгээр зүйлд “Монголбанк Засгийн газраас хараат бус байна”, “Засгийн газраас аливаа хэлбэрээр Монголбанкинд чиглэл өгөх, хуульд зааснаас бусад асуудлаар гэрээ, хэлцэл байгуулахыг хориглоно” гээд бүр хатуу заачихсан байдаг.

Нөгөө талаас Монголбанк бол УИХ-д шууд ажлаа тайлагнадаг хэдхэн байгууллагын нэг. Энэ утгаараа Монголбанкны удирдлагыг УИХ томилдог. Өөрөөр хэлбэл, Монголбанкны толгой хаашаа зүглэхийг Засгийн газар, Сангийн яам бус УИХ мэдэх учиртай. Харин улс төрийн хүрээнд ярьж, хэвлэлүүдэд бичиж буйгаар Монголбанкны тэргүүн дэд ерөнхийлөгч Г.Дөлгөөн гэж залуу дээрх үйлдлээрээ Монголбанкийг Сангийн яамны газрын хэмжээнд хүргэж, суганд нь хавчуулчихжээ.

Хэрвээ энэ үнэн бол, яваад хуулийн зөрчил гэж үзвэл хариуцлага тооцох ёстой л юм байна. Монголбанкны тухай хуулийн 26 дугаар зүйлд “УИХ Монголбанкны Ерөнхийлөгч, Тэргүүн дэд ерөнхийлөгч, Дэд ерөнхийлөгчийг дор дурдсан тохиолдолд албан тушаалаас нь чөлөөлөх асуудлыг шийдвэрлэнэ: / Монголбанкны эрх ашигт харш үйлдэл /эс үйлдэл/ гаргасан/ гэсэн байдаг. Тэгэхээр Г.Дөлгөөн дээр энэ асуудлыг ярих хангалттай үндэслэл байна гэсэн үг. Харин эхлээд УИХ-ын дарга Г.Занданшатараас “Монголбанкийг Сангийн яам мэддэг болчихсон юм уу” гэж асуух хэрэгтэй боллоо.

С.Сүлд