УИХ дахь Ардчилсан намын бүлгийн гишүүд энэ сарын эхээр Төв талбай дээр долоон өдрийн турш өлсгөлөн зарлаж, эцэстээ Ажлын хэсэг байгуулснаар тэмцлээ зогсоосон билээ. Тус ажлын хэсэг Ардчилсан намын тамганы асуудлыг дахин шалгах, Улсын Дээд шүүхийн лавлагаа хуулийн дагуу гарсан эсэхийг дахин хянах, Сонгуулийн Ерөнхий хороо Ерөнхийлөгчийн сонгуулийн хуулийг хангаж байгаа эсэх мэдээллийг сонсох, УБЕГ-ын зарим ажилтныг АТГ-д шалгуулах зэрэг дөрвөн асуудлыг хэлэлцэхээр тохиролцсон. Харин дээрх асуудал хэрхэн шийдэгдэж байгаа, өлсгөлөн зарласан гишүүд яагаад нам гүм болов гэдэгт сүүлийн үед олон нийт анхаарал хандуулах болсон. Тэгвэл энэ бүхэнд УИХ-ын гишүүн Н.Алтанхуяг, Н.Ганибал нар тайлбар мэдээлэл өглөө.
УИХ-ын гишүүн Н.Алтанхуяг "Монголын нийгэмд бий болсон шударга бус явдал хэрээс хэтэрснийг эсэргүүцэж, Ардчилсан намын 13 гишүүн өлсгөлөн зарласан. Энэ үеэр Төв талбай дээр ирж, сэтгэл санаа, эв нэгдэлтэйгээ байгаа илэрхийлсэн гишүүд дэмжигчиддээ талархал илэрхийлж байна. Ард түмэн ажлын хэсэг байгуулсан ажил нь ямар шатандаа явааг танилцуулах хүсэлтийг ихээр илэрхийлж байна. Тиймээс өнөөдөр мэдээлэл хийж байна" гэлээ.
УИХ дахь Ажлын хэсгийн дэд ахлагч Н.Ганибал "УИХ-ын дарга Г.Занданшатар энэ сарын 11-ний өдөр захирамж гаргаж, Ажлын хэсэг байгуулсан. Ажлын хэсэгт Ардчилсан намаас УИХ-ын гишүүн Ж.Батсуурь, Ц.Туваан болон миний бие, МАН-аас Ц.Мөнх-Оргил, Ц.Мөнхцэцэг, Ц.Сандаг-Очир нар ажиллахаар болсон. Ажлын хэсэг энэ сарын 17-ны өдөр хоёр дахь хурлаа хийсэн. Энэ үеэр Ардчилсан намын зүгээс тодорхой мэдээллүүдээ гарган өгч, бусад гишүүдээ мэдээллээр хангасан. Бид нэгдсэн ойлголттой болсон. Ажлын хэсэг хэлэлцэх асуудлынхаа дагуу холбогдох байгууллагууд руу албан бичиг илгээсэн. Энэ дагуу өнөөдөр дахин хуралдана" гэв.
Өмгөөлөгч А.Базар Ардчилсан намын тамганы асуудлаар мэдээлэл өглөө. тэрбээр "Ардчилсан намын тамганы асуудлыг захиргааны хэргийн шүүх хэлэлцэж байгаа. Өнгөрсөн даваа гарагт болсон шүүх хурлын дараа С.Эрдэнэ нар "Тамганы асуудал манай талд шийдэгдлээ" гэх мэдээллийг олон нийтэд цацсан. Энэ бол худал мэдээлэл. Учир нь С.Эрдэнэ гэх хүнд байгаа тамга нь хүчинтэй юу, хууль ёсны бус уу гэдэг шүүх хурал өнөөдрийг хүртэл болоогүй. Тэгэхээр ямар ч байдлаар шинээр болгосон тамга хүчинтэй эсвэл хууль бус гэдэг асуудлыг шийдээгүй.
Харин хэргийг эцэслэн шийдэх хүртэл шинээр олгосон тамга олгосон шийдвэрийг түтгэлзүүлэх үү үгүй юу гэдэг асуудлыг шүүх хурал болж байгаа юм. Анх 2021 оны хоёрдугаар сарын 2-ны өдөр анхан шатны шүүхээс шинээр тамга олгосон шийдвэрийг түтгэлзүүлсэн. Өөрөөр хэлбэл маргаан эцэслэн шийдэгдэх хүртэл энэ шийдвэр үйлчлэхгүй гэдгийг шийдсэн. Тэгэхээр СЕХ-нд хүлээлгэн өгсөн баримт материал хүчингүй гэсэн үг" гэдгийг онцлов.
Б.Баатар
