Монгол Улсын Ерөнхий сайд Л.Оюун-Эрдэнэ Засгийн газрынхаа 100 хоногийн ажлыг тайлагнах үеэр нэлээдгүй олон ноцтой асуудлыг дэлгэсэн. Тухайлбал, Ерөнхий сайд өмнө вакцинжуулалтын нийлүүлэлтийг тасалдуулж, улс эх орныхоо эсрэг үйлдэл гаргасан хүнийг удахгүй илчилнэ хэмээж нийтэд хэн бэ гэх асуултыг үлдээгээд удсан юм.

Харин ажлаа тайлагнах үеэр сэтгүүлчийн энэхүү асуултад тэрбээр “ УИХ-ын дэд дарга С.Одонтуяа болон түүний нөхөр Г.Өлзийбүрэн” хэмээн зарласан. Огт төсөөлөөгүй эрхмийн нэрийг зарласан нь  олныг гайхшруулж бас балмагдуулсан.

Харин үүний дараахан УИХ-ын дэд дарга С.Одонтуяа мэдэгдэл хийн “Дөнгөж сая Ерөнхий сайд Л.Оюун-Эрдэнэ тун хариуцлагагүй мэдэгдэл хийлээ. Миний хувьд энэ вакцины асуудалд нөлөөлөх боломжгүй. Энэ бол цэвэр Засгийн газрын ажил. Би вакцины талаар чуулган дээр төсөв батлахаас нь эхлээд вакциныхаа мөнгийг төсөвт суулгаач.

Мөн иргэдэд вакциныг сонголтоороо хийх боломжийг олгооч гэдэг зүйлийг хэлсэн. Шүүмжилсний төлөө намайг үндэслэлгүй гүтгэж байна. Би хуулийн байгууллагад хандаж шалгуулна. Засгийн газрын хариуцлагыг хувь хүн, сөрөг хүчин рүү чихэж байгаад харамсаж байна” гээд нэр төрийг гутаасан тул 100 сая төгрөг нэхэмжилж байна гэсэн билээ.

Гэвч хэнийх нь үг илүү жин дарж байна вэ.

Мэдээж Монгол Улсын Ерөнхий  сайдын хувьд УИХ-ын дэд дарга, түүний гэр бүлийн талаарх үгийг амнаасаа зүгээр нэг унагахгүй. Баримт, нотолгоотой болоод зарлана. Гэвч нөгөө талд улс төрийн тогоонд олон жил “чанагдсан” чамгүй улстөрч, хамгийн гол нь УИХ-ын дэд дарга хүн тийм үйлдэл хийсэн гэдэгт хэн ч итгэмгүй.

Харин үүнийг хагалах нь, эцэслэх нь мэдээж хууль, хяналтын байгууллага юм. Тиймдээ ч Ерөнхий сайд Л.Оюун-Эрдэнэ УИХ-ын дэд дарга С.Одонтуяа болон нөхөр Г.Өлзийбүрэн нарыг ганц вакцинжуулалттай холбоотой бус өөр олон асуудлаар шалгуулахаар хуулийн байгууллагад ханджээ.

Ам нээвэл уушиг нээ гэгчээр үнэн худал нь тодорхойгүй, эргэлзээ төрүүлсэн, чихэнд нь хүрсэн ч итгэмгүй олон үйлдлийг нь нэг дор шалгуулан эцэслэхээр шийдсэн нь энэ аж.

-Эн тэргүүнд гэр бүлээрээ коронавирусний эсрэг вакцины хууль бус бизнес эрхлэхийг завдсан хэргийг шалгуулахыг хүсчээ. Үүнд, тэднийг цар тахлын эсрэг вакциныг хууль бусаар оруулж ирэх, худалдаалах зорилгоор аливаа хуулийн этгээд, иргэн С нарын хувь хүнтэй яриа хэлэлцээр хийсэн эсэхийг,

-УИХ-ын дэд дарга С.Одонтуяа, түүний нөхөр Г.Өлзийбүрэн нар нь “Хонгил”-ын өмгөөлөгч Б.Баасанцогттой  мөн нэр холбогджээ. Эхний байдлаар тэд Б.Баасанцогтоор зуучлуулан Хан-Уул дүүргийн Иргэний хэргийн шүүхийн Э, М нарт авлига, хээл хахууль өгсөн эсэхийг,

-Мөн тэд Улаанбаатар хот дахь Гаалийн газрын байцаагч нарт нөлөөлж, 801 хайрцаг барааг улсын хилээр татваргүй болон хуурамч бичиг баримт бүрдүүлэн оруулж ирсэн гэх мэдээллийг.

- Дорнод аймгийн нутаг дэвсгэр дэх газрын тосны талбай болон бусад ашигт малтмалын лицензийг хууль бусаар эзэмшилдээ авсан эсэхийг,

-“Оюутолгой”, “Эрдэнэс Монгол”, “Эрдэнэс Оюутолгой” компаниуд болон ТӨҮГ-уудын худалдан авалтад нөлөөлж бараа материал “шахах”-ыг оролдсон, мөн хүүгийнхээ  болон өөрсдийнхөө дансаар мөнгө шилжүүлэн авсан эсэх,

-УИХ-ын дэд дарга С.Одонтуяа нь Баянгол дүүргийн Засаг даргаар ажиллаж байхдаа өөрийн ойр дотнын хүмүүстээ дүүргүүдэд хийх ажлын нэр бүхий тендерүүдийг авч өгөхдөө илт давуу байдал олгосон.

Энэ мэт олон асуудлыг эцэслүүлэхээр Ерөнхий сайд цагдаа, тагнуулын байгууллагад хандсан бол УИХ-ын дэд дарга С.Одонтуяа гэр бүлийн хамт мөн хуулийн байгууллагад гомдол гарган нэр төрд халдсан үндэслэлээр 100 сая төгрөг нэхэмжлээд буй юм. Үүнийг л сөрсөн базаа гэнэ. Харин цаг хугацаа удахгүй  хэнийх нь буруу, зөвийг шүүж, энэ бүхэн нийтэд тодорхой болно биз ээ. 

У.Тэргэл