Ардчилсан намаас цаг үеийн асуудлаар мэдээлэл хийлээ.

Нийслэлийн Ардчилсан намын зүгээс "Орон нутгийн сонгуулиар НИТХ-ын дарга асан Ж.Батбаясгалан, НИТХ-ын төлөөлөгч Г.Гангамөрөн нарыг мөнгө тарааж байсныг баталгаажуулсан. Мөн Чингэлтэй дүүрэгт мөнгө тарааж байсныг илрүүлсэн нэрийн жагсаалтыг өөрчилсөн зэрэг асуудлаар холбогдох хууль хяналтын байгуууллагад шалгуулах хүсэлт гаргаж байсан. Бидний гомдлыг шалгаж үзээд сонгуулийн хууль тогтоомж зөрчөөгүй гэх шийдвэр гаргасан. Гэсэн ч бид дахин хүсэлт өгч шалгуулж байгаа. Сонгуулийн тухай хууль ил тод байх зарчим алдагдах болсон. Сонгогчдын хурууны хээний тэмдэглэгээг хийхээ больсон. Нэрсийн жагсаалтыг нам эвсэлүүдэд өгдөг байсан ч үүнийг болиулсан нь хууль тогтоомж зөрчиж, өөрсдөдөө давуу байдал олгож байгаа учир гомдол, нэхэмжлэлээ гаргасан" гэв.

Нийслэлийн Ардчилсан намын дарга Э.Бат-Үүл "МАН сонгуулийн хууль тогтоомж зөрчиж байгаа талаар хуулийн байгууллагад хандсан. Хоёр долоо хоногийн өмнө цахим санал хураалтыг будилуулж, хакердах үйл ажиллагаа явуулахаар МАН-ын зүгээс санал тавьсан иргэн бидэнд хандаж, хамтран мэдээлэл хийж байсан. Гэтэл энэ асуудалд тагнуул, цагдаа, прокурорын байгууллага хариуцлагагүй хандсан. Тэр тусмаа гомдол гаргасан Нийслэлийн Ардчилсан намд ямар ч хариу мэдэгдэлгүйгээр хэргийг хаасан. Энэ хэргийн хохирогч нь Нийслэлийн Ардчилсан нам, ард түмэн байгаа. Гэтэл гомдол мэдүүлсэн газарт мэдэгдэлгүй хэргийг хаасан. 

Хууль хяналтын байгууллага Нийслэлийн Ардчилсан намыг дорд үзэж байна. Ийм байдлыг бид хүлээн зөвшөөрч чадахгүй. Тиймээс ирэх пүрэв гарагт буюу зургаадугаар сарын 3-нд энэ хэргийг шалгахыг шаардаж эсэргүүцлийн цуглаан зохион байгуулна. 

МАН-д үйлчилж байгаа хууль хяналтын байгууллагын хүмүүсийг явуулахыг шаардаж бид цуглана. Ингээд зогсохгүй Нийслэлийн Ардчилсан намын хорооны дэргэд энэ хэргийг тусгайлан мөрдөн шалгах хороог өөрсдийн хороог байгуулна. Бидэнд үл тоомсорлосон байдалтай хандаж байгааг зөвшөөрөхгүй. Энэ асуудлыг шийдэхгүй бол дараа, дараагийн тэмцлийн хурц хэлбэрт шилжинэ" гэлээ.

Б.Баатар