Ерөнхий сайд Л.Оюун-Эрдэнэ УОК-ын Шуурхай штабт ажиллаж байна.

Тэрбээр энэ үеэр “Засгийн газраас 4-6 сарыг вакцинжуулалтын сар болгон зарласан. Өнөөдрийн байдлаар улсын хэмжээнд нэгдүгээр тунд 1.8 сая иргэн буюу зорилтот бүлгийн 89.9 хувь, хоёр дахь тунд 1.3 сая иргэн буюу 64 хувь нь хамрагдсан байна. Хоёр дахь тундаа хамрагдах иргэдийн идэвх суларч байгаа гэсэн мэдээ ирж байна. Тиймээс Ерөнхий сайдын хувьд нэгдүгээр тундаа хамрагдсан бол  хоёр дахь тундаа заавал хамрагдах нь чухал гэдгийг уриалмаар байна.

Санаа зовоосон хоёр дүгнэлт гарсан. Тодруулбал, 5-14, 15-24, 25-34 насныхан  хамгийн их халдварт өртөх эрсдэлтэй байна. Вакцинд хамрагдсан ч халдвар тээгч болоод бусдад тараагаад яваад байж болзошгүй байна.

Манай улсад вакцинжуулалтад хамрагдаагүй 1.1 сая хүүхэд, мөн жирэмсэн эмэгтэйчүүд байна. Тиймээс халдвар хамгааллын дэглэмээ хэрхэн барих вэ гэдэг асуудал чухал байна. Дэлхийд одоогоор хүүхэд, жирэмсэн эмэгтэйчүүдэд тарихаар туршсан нэг вакцин байгаа нь Файзер вакцин юм. Үүнтэй холбогдуулан хэлэлцээр хийж байгаа. Эхний ээлжид Файзерын 100 мянган тун вакцин орж ирсэн.

Эрдэмтдийн судалгаагаар, хоёр дахь тун вакцинд хамрагдсан иргэдийн тоо нэмэгдэх тусам тохиолдлын тоо буурах судалгаа гарсан. Энэ үр дүн зургаадугаар сарын 15-нд гарна. Ер нь долоодугаар сарын 1 гэхэд тохиолдлын тоо буурах хандлагатай байна.

Вакцин 75 хувь үйлчилсэн тохиолдолд халдварын тоо буурна гэж үзэж байгаа юм байна. Харин манай улсад вакцины үйлчлэл 80 хувь байна гэж дүгнэсэн таатай мэдээ байна. Цаашид Засгийн газар Файзер вакцин оруулж ирэхэд анхаарна" гэлээ. 

Б.Лхам