Үндэсний их баяр наадам удахгүй болно. Баяр наадмыг зохион байгуулах ажлыг Соёлын яам бие даан хариуцаж байгаа бөгөөд 10 тэрбум төгрөг төсөвлөснийг нийгмээрээ шүүмилж буй юм. Тэгвэл Соёлын сайд Ч.Номин уг асуудалд байр сууриа ийнхүү илэрхийлжээ.

Тэрбээр цахим хуудастаа “Шинэ долоо хоногийн мэнд хүргэе. Удахгүй улсын баяр наадам болох гэж байгаатай холбоотой цар тахлын нөхцөл байдлыг зайлшгүй тооцож үзэх нь зүйн асуудал билээ. Хүн бүр санаа зовинон, өөрсдийн үзэл бодлоо илэрхийлж байгаа ч бид аливаад ул суурьтай хандах нь чухал. Тиймээс дараах тайлбарыг хүргэж байна. Үүнд,

-Монголчууд бид эртнээс уламжилж ирсэн өв соёл, төрт ёс, зан заншлын хэлхээ баяр наадамдаа өндөр ач холбогдол өгдөг хэдий ч энэ хүнд цаг үед эрэмбэлэн үзвээс нийгмийн эрүүл мэндийг хамгаалах нь нэн тэргүүний ажил яах аргагүй мөн.

-Баяр наадмыг зохион байгуулах нь Шадар сайдын эрхлэх ажилд хамаардаг бөгөөд есөн салбар хорооны хамтарсан баг ажилладаг. Энэ нь дан ганц Соёлын яам хийдэг ажил биш юм.

-Баяр наадмын төсвийг Соёлын яаманд бус нийслэл Улаанбаатар хотод хуваарилсан байдаг бөгөөд яамны зүгээс болон бусад байгууллага үйл ажиллагаагаа хамтран хийж хэрэгжүүлдэг билээ.

Харин хувь хүнийхээ тухайд хүн олноор цугласан арга хэмжээг хийхгүй байх нь зөв гэдэгт санал нэг байна. Гэхдээ баяр наадмыг тэмдэглэн өнгөрүүлэх тухай эцсийн шийдвэр төр, засгаас албан ёсоор гараагүй байгаа тул Та бүхэн дархлаагаа унагалгүй, хүлээцтэй байж, олон нийтийн сүлжээнд удаа дараа гарч буй ташаа мэдээлэлд авталгүй албан эх сурвалжаас баттай мэдээлэл авч байхыг хүсье” гэжээ.