Коронавирусний халдвар зах замбараагаа алджээ. Энэ нөхцөлд юун баяр наадам, ярих ч юм биш. Эхнээсээ зарим улсууд манайд хилийн хориг тавьж, манай улсаас нэг ч хүн хүлээж авахгүй гэдгээ мэдэгдлээ. Экспорт ч тасалдаад эхэлсэн. Энэ бүхнээс "том"-чуудын ямар ч төлөвлөгөө, тактикгүй ажилласныг л харж болно. 

Өнөөдөр улсаараа улаан бүс болчихоод Улсын их баяр наадмыг тэмдэглэх эсэх талаар яриад сууж байгаа нь сайд дарга нарын бодит төрх.

Хоногийн хоолоо арайхийн хүргэж байгаа олон хүн бий. Гэтэл коронавируснийх нь шинжилгээ 90 мянга. Хэрэв ковид туссан бол мөнгө нь тухайн хүн хэр хүнд өвчилснөөс хамаарч харилцан адилгүй. Лав хоногийн хоолоо чүү айтай болгож байгаа иргэд хүнсээ залгуулах уу, эмээ авах уу гэдэг сонголтод тулж байна хэмээн цахим хуудастаа бичсэн байна лээ. 
Ядаж байхад коронавирусний халдварын үед хэрэглэж буй эмний эрэлт нэмэгдээд ирэхээр үнийг нь өсгөчихнө. Өлөн зантай гэж тайлбарлах уу, юу гэх вэ. Яг л анх цар тахал дотоодод халдварлаж байх үед маскны үнэ тэнгэрт хадаж байсан шиг. 
Цар тахал эрчтэй тархаж байгаа нь иргэдийн хөдөлгөөн нэмэгдсэнтэй холбоотой гэж мэргэжлийн байгууллагаас нь тайлбарласан. Гэхдээ цар тахал яагаад ийм хэмжээнд хүрэх болов гэдэг гол шалтгааныг нь тайлбарлах хэрэгтэй. Тодотгож хэлбэл, олон удаагийн хөл хориог үр дүнгүй болгосон шалтгаан нь юутай холбоотой вэ гэдгийг шүү дээ. Сайд дарга нар дураараа дургиж, орон нутгаар хэсүүчлэхээр тардаггүй нөхцөл нь хүртэл тусгай, тийм халдвар биш биз дээ. Ер нь иргэнд ч бай, "том" даргад ч бай гаргасан дүрэм журам чинь ижил л үйлчилдэг баймаар байна.

А.Сүх