Франц-Монголын найрамдлын бүлгийн дарга Филипп Мүэй тэргүүтэй сенатын гишүүдийн Монгол дахь албан ёсны айлчлал дөрөв дэх хоногтоо үргэлжилж байна. Өнөөдөр Хавдсар судлалын үндэсний төвийн үйл ажиллагаатай танилцаж, хамтран ажиллах боломжуудын талаар санал солилцлоо.
Франц улс анагаахын шинжлэх ухаан, мэс заслын чиглэлээр дэлхийд тэргүүлдэг. Ялангуяа нийгмийн эрүүл мэндийн асуудалд ихээхэн анхаарч ажилладаг. ХСҮТ-ийн эмч мэргэжилтнүүдээс Францад анагаахын чиглэлээр нарийн мэргэжил эзэмшсэн, мэргэжил дээшлүүлсэн чадварлаг эмч олон бий. 
Монголчуудын дунд хорт хавдрын өвчлөл, нас баралт маш их. Хэчнээн чадварлаг эмчтэй, сайн эмчилсэн ч хавдрын өвчлөл төдийлөн буурахгүй байгаа нь урьдчилан сэргийлэх үзлэг оношилгоо, эрт илрүүлэх тогтолцоог үндэсний хэмжээнд хэрэгжүүлж чадахгүй байгаатай холбоотойг ХСҮТ-ийн Ерөнхий захирал Н.Эрдэнэхүү хэллээ.
Тиймээс эрт илрүүлгийг сайжруулахад онцгой анхаарч "Уьдчилан сэргийлэх клиникийн төв" байгуулах засгийн газрын тогтоол саяхан гарсан. Энэ төв нь хөдөө орон нутаг, 21 аймагт нэгжүүдийг байгуулж үндэсний сүлжээгээр хавдрыг илрүүлэх тогтолцоотой болох томоохон төсөл юм. Уг зорилго, эрт илрүүлэх тогтолцоог Монгол улсад бий болгоход Франц улсын туршлага, мэдлэг чадвар бүхий л талаараа хэрэгтэй учир дэмжин туслахыг хүслээ.
Франц-Монголын найрамдлын бүлгийн дарга Филипп Мүэй хэлэхдээ, Эрүүл мэндийн салбарт, тэр дундаа хорт хавдрын тухайд урьдчилан сэргийлэлт бол маш чухал. Гэвч зөвхөн нэг эмнэлгийн ажилтан, эмч нарын хийх зүйл бус нийгмийн эрүүл мэндийн бодлогын хүрээнд анхааран ажиллах нь зүйтэй. Урьдчилан сэргийлэх чиглэлд хөрөнгө оруулалт хийх нь ойрын хугацаандаа шууд үр дүн харагдахгүй мэт боловч урт хугацаандаа асар их хөрөнгө мөнгийг хэмнэсэн төсөл байдаг учир энэхүү тогтолцоог Монголд бий болгох гэж буйг дэмжиж байгаагаа илэрхийлэв.
Хавдар судлалын үндэсний төв болон Францын түншлэл, хамтын ажиллагааны гурван зам мөр байгаа талаар хэллээ. Үүнд:
Нэгдүгээрт, Мэс засал, хавдрын чиглэлээр нарийн мэргэжил эзэмших гэж байгаа Монгол оюутнуудыг Францад олноор нь сургах боломжтой. Засгийн газар хоорондын тэтгэлэгт хөтөлбөрийн хүрээнд хавдрын чиглэлээр нарийн мэргэжил эзэмших гэж буй оюутнуудыг илүүтэй дэмжиж, суралцах явцад нь санхүүгийн дэмжлэг үзүүлнэ.
Хоёрдугаарт, ХСҮТ-д Францын ижил чиглэлийн сургалт, боловсролын байгууллагатай маш тодорхой, нягт хамтын ажиллагааны түншлэл үүсгэж өгөх бүрэн бололцоотой. Өөрөөр хэлбэл ХСҮТ-ээс ямар чиглэлийн сургуультай түншлэлийн гэрээ байгуулах хүсэлтэй байна түүнийг нь дэмжинэ.
Гуравт, Глобал хамтын ажиллагаа. Францад мөн адил хорт хавдрын үндэсний төв бий. Тэрхүү төв нь олон улсын хамтын ажиллагаанд илүү ач холбогдол өгдөг. Тиймээс ХСҮТ-тэй хавдрын шинжлэх ухааны судалгаануудыг хамтран явуулах, аль аль салбарт ямар судалгаа явуулах хүсэлтэй байгаа дээр үндэслэн тухайн институттэй хамтран ажиллах, туршлага солилцох боломжтой.
Түүнчлэн Францын эмнэлэг, эрүүл мэндийн байгууллагуудтай ямарваа нэгэн төсөл хэрэгжүүлэх тал дээр бодлогоор дэмжин, хамтран ажиллахад таатай байх болно гэдгээ сенатцид илэрхийллээ.
