АНУ-аас Италид суугаа элчин сайд Тилман Фертитта 450 сая ам.долларын үнэтэй “Boardwalk” супер дарвуулт онгоцоороо Италийн эрэг дагуу аялж, дипломат харилцаагаа бэхжүүлэх өвөрмөц арга хэрэгжүүлж байна. 69 настай Техасын тэрбумтан Фертитта уг аяллыг зүгээр нэг тансаг амралт бус, АНУ, Италийн харилцаа болон хөрөнгө оруулалтын хамтын ажиллагааг хөгжүүлэх боломж гэж үзэж байгаа аж.
Түүний энэ зуны аялал зургадугаар сард эхэлж, Сицили, Венец, Сардини зэрэг Италийн олон хотод зогссон байна. Аяллын үеэр тэрээр улс төрчид, орон нутгийн удирдлагууд, цэргийн албан хаагчид болон Италийн бизнес эрхлэгчдийг хөлөг дээрээ хүлээн авчээ. 380 фут буюу ойролцоогоор 116 метр урт, зургаан үндсэн давхар бүхий “Boardwalk” нь хоёр усан бассейн, хоёр нисдэг тэрэгний талбай, гольфын талбай, рашаан сувиллын хэсэг, кино театр зэрэг тансаг байгууламжтай.
Гэхдээ Фертитта өөрийн хөлөгт бусад супер дарвуулт онгоцонд тэр бүр байдаггүй нэг зүйл болох “гэр бүлийн гал тогоо”-г зориуд хийлгэжээ. Тэрээр гал тогоогоо гэр бүлийнхэн нь энгийнээр хоол хийж, хамтдаа цаг өнгөрөөх зориулалттай гэж тайлбарласан байна.
Гэхдээ энэ “энгийн” гал тогоо нь 450 сая ам.долларын үнэтэй хөлөг онгоцны дотор байрладаг. Хөлөгт Италийн Мурано шилэн урлал, үнэтэй урлагийн бүтээлүүд, гантиг болон мозайк чимэглэл, тансаг гэрэлтүүлэг, шилэн цахилгаан шат зэрэг бий. Мөн хүүхдүүдэд зориулсан тоглоомын өрөө, усан онгоцноос эрэг рүү зорчих завь, тийрэлтэт цана зэрэг олон төрлийн хэрэгсэлтэй. Фертиттагийн эхнэр Лорен Уэр Фертитта охин Эллед зориулсан тоглоомын өрөөг өөрөө тохижуулжээ.
Хөлөг онгоцны аяллын үеэр Фертитта Италийн алдарт тенор Андреа Бочеллитэй нөхөрлөсөн тухайгаа ч ярьсан байна. Бочелли “Boardwalk” дээрх цагаан төгөлдөр хуур дээр тоглож байсан бөгөөд Фертитта түүний тоглолтыг гар утсаараа үзүүлж, “Тэр үнэхээр гайхалтай авьяастай” хэмээн магтжээ.
Фертитта энэ аяллаа “Freedom 250 Coastal Diplomacy Tour” буюу АНУ тусгаар тогтнолоо байгуулсны 250 жилийн ойтой холбогдуулсан эргийн дипломат аялал хэмээн нэрлэж байна. Гэвч энэхүү тансаг аялал Италид шүүмжлэл дагуулсан. Зарим иргэд болон улс төрийн хүчнүүд тэрбумтан элчин сайд хувийн 450 сая ам.долларын хөлөг онгоцоо дипломат ажиллагаанд ашиглаж байгааг зохимжгүй гэж үзжээ. Венецид ч түүний хөлөг онгоц ирэх үеэр эсэргүүцлийн жагсаал болсон байна.
Фертитта харин шүүмжлэлийг үл тоомсорлож байгаа бөгөөд “Би үүнийг гайхуулахын тулд хийгээгүй. Энэ нь Америк, Италийн харилцаанд болон өөрийнх нь хүмүүстэй харилцах харилцаанд үр дүнтэй” хэмээн тайлбарлажээ.
Тэрбээр Италийн элчин сайдын албыг удаан хугацаанд мөрөөдөж ирсэн бөгөөд өөрийн гэр бүлийн итали гарал угсаа энэ албыг хүлээн авах хүсэлд нь нөлөөлсөн гэж ярьсан байна. Фертиттагийн АНУ-ын Ерөнхийлөгч Дональд Трамптай харилцаа 1999 оноос эхтэй. Тухайн үед тэрээр Трампын Plaza Hotel and Casino-д Rainforest Café рестораныг хөгжүүлж байжээ.
Өдгөө тэрбээр дипломатчийн хувиар Италийн хотуудаар аялж, өөрийн супер дарвуулт онгоцыг бизнес, улс төр, дипломат уулзалтын нэгэн төрлийн “хөвөгч дипломат төв” болгон ашиглаж байна.
Л.Баяр
