Коронавирусний халдвараар өвчилсөн иргэд эмнэлэгт хэвтэн эмчлүүлж чадахгүй болоод хэдэн сарын нүүр үзлээ. Эмнэлгүүд ачааллаа дийлэхгүй, ор хүрэлцэхгүй байгаа учир халдвар авсан иргэд өөрөө, өөрийгөө эмчлэх болоод удаж байна. 

Хатуухан хэлэхэд, төр засаг коронавирусний халдварыг дийлэхээ больсон тул иргэдээ хөвөр хаясан. Үүнийг ч иргэд ил тод хэлж байна. Тэр ч бүү хэл халдвар авсан иргэд эмнэлгийн тусламж авч чадахгүй таалал төгссөн хэд, хэдэн тохиолдол гарсан нь үүнийг нотлох шиг.  

Гэтэл Эрүүл мэндийн сайд С.Энхболд "Иргэд эмнэлэгт хандах хүсэл нь давамгайлж, эмнэлгийн ор дүүргэж байна. Гэрээр хянагдаж байгаа хүмүүс бол хүчилтөрөгчийн шаардлагагүй хүмүүс. Ямар нэгэн байдлаар цээж өвдөх, зовуурилах шинж тэмдэг илэрч байгаа учраас эмнэлэгт хэвтэж байна.

Сангийн сайд, Эрүүл мэндийн сайдын хамтарсан тушаалаар коронавирусний халдвар нь батлагдсан нэг иргэнд үзүүлэх тусламж үйлчилгээг 160 мянган төгрөг гэж баталсан.

Анхан шатны тусламж, үйлчилгээ үзүүлж байгаа эмнэлгүүд түргэвчилсэн тестийг тэр тарифт оруулахад хангалттай. Тэр талаар чиглэлийг ч өгч байгаа. Хэрвээ иргэн өөрөө хавьтал болоод, эмнэл зүйн шинж тэмдэг илрээд байвал өрхийн эмнэлэг дээрээ очоод үнэ төлбөргүй түргэвчилсэн тестийн шинжилгээ өгөх бүрэн боломжтой" хэмээн хээвнэг яриад зогсох байх. 

Коронавирусний халдвар анх дэгдэж байхад хөнгөн туссан бүү хэл хавьтал болсон иргэдийг ч нэг бүрчлэн тандаж, тусгаарлаж байсан. Тэр ч байтугай нэгэн залууг нийтийн тээврээс хөөж буулгаж байсан түүхтэй. Гэтэл өдгөө халдвар авсан иргэд эмнэлэгт хэвтэх гэлээ, гэрээ эмчлэгдэж байгаа иргэдэд 160 мянган төгрөгний багц олгож байгаа гэх. 

Угтаа иргэдэд 160 мянган төгрөгний багц бус, 20 мянган төгрөг хүрэхгүй эм очиж байна. Зарим өрхийн эмнэлгүүд нэг ширхэг эм ч олгохгүй байгаа талаар иргэд хэлж, цахим сүлжээнд байр сууриа илэрхийлсээр буй. 

Харин С.Энхболд сайдын хэлээд буй 160 мянган төгрөгний багц хаагуур хэний халаасыг дүүргэж байгааг таашгүй. Өчигдрийн Эрүүл мэндийн яамны мэдээллээр нийт 44 мянга 122 хүн гэрээр эмчлүүлж байгаа аж. Тэгэхээр эдгээр хүмүүс 160 мянган төгрөгний багцыг бүгд авсан гэж тооцвол нэлээд өндөр тоо гарна. Харин эдгээр хүмүүсийн гарт дээрх багц бүрэн очоогүй бол хаана, хэнд хүрэв гэх асуулт ч урган гарч байгаа юм.

Эрүүл мэндийн сайдын хэлээд буй 160 мянган төгрөгний багц иргэдийн гар дээр хэрхэн хүрч байгааг зургаар үзүүлье. Сайд та нэгийг бодож, хоёрыг тунгаана буй за. 

Б.Баатар