"Фантастик продакшн" дөрвөн жилийн дараа дэлгэцийн уран бүтээлээрээ эргэн ирж байна. Бүтээлээрээ дамжуулж хэлэх гэсэн санаагаа тодоор илэрхийлдэг тэдний хувьд шинэ "Зура" төслийг үргэлжлүүлэхээр зэхжээ. Ингээд "Зура 2:Цурам ажиллагаа" уран сайхны киноны гол дүрийн жүжигчин Ж.Алтаншагайтай шинэ уран бүтээлийнх нь талаар хэсэг хөөрөлдсөнөө хүргэе. 

-Ням гараг амралтын өдөр ч гэлээ таны хувьд ажлын өдөр нь ярилцахаар ирлээ.  Нэг өдрийн амьдралаасаа хуваалцаач. Таны өдөр хэрхэн өнгөрдөг вэ?

-Надад ер нь амралтын өдөр гэж байхгүй. Дөрвөн улирлын турш завгүй амьдрал өнгөрдөг. Гэр бүлдээ цаг зав гаргах нөхцөл бага л даа. Мэдээж уран бүтээлтэй, хажуугаар нь хурим найр, тоглолтууд ихтэй байдаг. Өнөөдөр мөн ялгаагүй ажилтай явж байна.

-Намар ирж хурим найрын сар  эхэллээ. Өнөөдрийн хурим таны хөтөлж байгаа хэддэх хурим бэ?

-Энэ жилийн 30-н хэддэх хурим байх. Кино зураг авалттай болохоор олон хурим хөтөлсөнгүй.

-Тун удахгүй “Фантастик продакшн”-ы шинэ уран бүтээл “Зура 2: Цурам ажиллагаа” кино нээлтээ хийх гэж байна. Кино төслийн талаар уншигчдадаа мэдээлэл өгөөч?

-Миний хувьд киноныхоо гол дүрд тоглож байгаа. “Фантастик продакш”-ны ээлжит уран бүтээл үзэгчдийн хүртээл болох гэж байна. Бараг 2019 оноос хойш буюу “Байтаг Богд” уран сайхны киноноос хойш кино театр киногоо нээгээгүй юм билээ. “Зура 1” киног тухайн үеийн ковидын нөхцөл байдлаас болоод цахимаар нээлтээ хийж байсан. Харин энэ удаа кино театртаа эргэн ирж байгаадаа баяртай байна.

-Гурваас дөрвөн жилийн дараа эргэн ирж байгаа дэлгэцийн уран бүтээл шүү дээ. Таны хэлснээр “Зура 1” кино цахимаар нээлтээ хийж байсан. Харин одоо үзэгчидтэйгээ уулзах гэж байна. Энэ сэтгэгдлээсээ хуваалцаач?

-Мэдээж сэтгэгдэл өндөр байлгүй яах вэ. Уран бүтээлч хүний гайхалтай сайхан, кайф авдаг, хамгийн гоё цаг хугацаа бол уран бүтээлээ хийж дуусаад үзэгч түмэндээ хүлээлгэж өгөх. Кино нээлтдээ оролцох гэдэг бол уран бүтээлч хүний хамгийн сайхан мөч байдаг.

-Кино найруулагч энэ удаад танд ямар дүр өгсөн бэ?

-Надад их сайхан дүр өгсөн гэж боддог. Ер нь манай найруулагч сайхан, сайхан дүрүүд өгдөг. Жүжигчин хүн дүр голох эрхгүй. Авсан дүрээ өөрийнхөө мэдрэмжээр, найруулагчийнхаа тавилтаар маш гоё амилуулах ёстой. Энэ бол жүжигчний үүрэг. Энэ удаагийн дүр миний амьдралдаа мөрөөдөж явсан дүрийн минь нэг гэж хэлж болно.

-“Зура 2: Цурам ажиллагаа” киноны дүрийнхээ талаар дэлгэрэнгүй танилцуулж болох уу?

-Дүрийг та бүхэн очоод үзсэн нь дээр байх гэж бодож байна. Ямартай ч гоё дүр дээ.

-Таны амилуулсан дүрүүдэд эсрэг талын  дүр олон бий. Энэ удаад аль талдаа байгаа бол?

-Эерэг талдаа байгаа. Яахав, сөрөг дүр гэх юм уу, эсрэг дүр гэвэл “37 дугаар точка” дээр хүмүүс эсрэг дүр гэж хардаг. “Маш нууц 1”, “Зүрхний хилэн” зэрэг киноны эсрэг дүрүүд байгаа. Энэ удаагийн дүр эерэг дүр. Гэхдээ арай өөр скилл, ур чадваруудыг шаардсан дүр байсан.

-Зарим жүжигчид дүрээ бүтээнэ гэж ярихаас эмзэглэдэг. Таны хувьд дүрээ бүтээв үү, кинонд тоглов уу?

-Амьдрахыг л бодно. Тоглох биш. Бүтээнэ гэж айхтар том үгээр яриад яах вэ. Энэ дүр дээр ажилласан, амьдрах гэж хичээсэн.

-“Зура 2:Цурам ажиллагаа” киноны дүр дээр ажиллахад танаас ямар шинэ ур чадваруудыг шаардав. Дүртэйгээ хэр ажилласан бэ?

-Хуучин тулаантай, эйкшн хэсгүүдтэй кино бидэнд байсан. Энэ удаа бол шинээр зэвсэг орж ирсэн. Би өөрөө энэ спортоор хичээллээд нэлээд хэдэн жил болж байна. Манай кинонд олон найзууд маань зөвлөхөөр ажилласан. Монголын гурван төрөлт төмөр буудлагын холбооны тэргүүн, практик буудлагын ОУХМ П.Эрдэнэбилэг ах маань, Цагдаагийн тусгай ажиллагааны газрын, миний дотны найз Төгс гээд залуу бий. Би тэр талын олон найзтай. Тэд нар маань чин сэтгэлээсээ кинонд маань тусалсан. Өнгөрсөн хавраас бид сар гарны бэлтгэлтэй байж байгаад кинондоо орсон. Ерөнхийдөө шинэ ур чадварыг шаардсан. Жишээлбэл, буудлага, зэвсэг барилт, ямар нэг өрөө тасалгаа, хаашаа ч юм бэ тулаан хийх гээд орохдоо яаж зөв орох вэ гэх мэт асар олон нарийн үйлдлүүдийг энэ дүр өөрөө шаардаж эхэлсэн. Тэрэндээ зориулж өөрсдийгөө бэлдсэн гэсэн үг.

-Буудлагын спорт таны хобби юу?

-Тийм ээ, миний хобби.

-Хоббигоо кинондоо оруулахад ямар байсан бэ?

-Их гоё байсан. Сэтгэл өндөр байгаа. Би түрүүн хэлсэндээ, мөрөөдөж явсан дүр гэж. Өөрөө ийм хоббитой учраас зэвсэгтэй тулаантай, буутай кинонд тоглохыг мөрөөддөг байсан. Тэр хоббиндоо хөтлөгдөөд энэ кинонд буудлагын ур чадваруудыг гаргасандаа баяртай байгаа.

-“Фантастик продакшн” байгуулагдаад 14 жил болж байна. Үзэгчид ч шинэ уран бүтээлийг нь тэсэн ядан хүлээдэг болсон харагддаг. Шинэ уран бүтээл өмнөхөөсөө хэд хэдэн онцлогтой харагдаж байсан. Ялангуяа жүжигчдийн бүрэлдэхүүн.

-Тийм ээ. Энэ  киноны нэг том онцлог бол жүжигчний штаб байсан. МУГЖ Ш.Доржсүрэн ах, С.Болд-Эрдэнэ ах, С.Ариунбямба ах маань, Монгол Улсын ардын жүжигчин Мягмарнаран ах гээд маш олон бие бүрэлдэхүүнтэй. Найруулж байгаа, арын багт ажиллаж байгаа хүмүүс МУУГЗ Н.Ганхуяг багшийн шавь нар. Манай Б.Тамир, М.Баярбат, Ганчулуун гэх мэт. Гэтэл, нөгөө талдаа кинонд тоглосон жүжигчдийн хувьд С.Болд-Эрдэнэ ах,С. Ариунбямба ах, би бид хэд чинь МУУГЗ С.Сугар багшийн шавь нар. Ингэж ажилласан нь  надад бас сонирхолтой, сайхан санагдаж байсан. С.Сугар багш маань маш мундаг хүн байсан. Багшийнхаа хүүхэдтэй буюу С.Болд-Эрдэнэ ахтайгаа, С.Ариунбямба ахтайгаа, Ш.Доржсүрэн ахтайгаа нэг кинонд цуг орох үнэхээрийн сэтгэл өндөр байгаа.

-Жүжигчдийн бүрэлдэхүүнд гадаад жүжигчид оролцсон байсан шүү дээ. Энэ талаар дурдахгүй өнгөрч болохгүй байх?

-Энэ удаагийн киноны бас нэгэн онцлог нь дэлхийн стандартад нийцүүлэх гэж хичээсэн. Камер, хийж байгаа хийцийн хувьд ч тэр. Мөн Малайз, Сингапурын жүжигчид ирж оролцсон. Сайхан байсан. Мундаг залуучууд ирсэн. Бас дэлхийд алдартай “Мулан” гэх мэт олон кинонд стантаар, протехникээр ажилласан Казакстаны “Номад”-ын мундаг залуучууд ирж оролцсон.

-Киноны арын албанд хэчнээн хүн ажилласан бэ?

-Кино багт 60,70  орчим хүн ажилласан. Яагаад гэвэл нэлээд том зургуудтай, хүний бүрэлдэхүүний хувьд өргөн байсан. Кино өөрөө хамтын бүтээл шүү дээ. Олон хүн оролцдог. Олуулаа байж тэр зургийн ард гардаг. Кинонд гарах нэг минут, эсвэл 30 секундийн зургийг авах гэж хэдэн зуун хүн ажилладаг. Энэ киноны ард ажилласан “The brother merchants” буюу 5.11 Mongolia гэж тактикийн хувцасны дэлгүүрийн хамт олон, Тамираа ах, Хангал болон найзууддаа маш их баярлалаа гэж хэлмээр байна. Маш олон хүн тусалсан. Яриад байвал олон хүн байгаа.

-Найруулагч Б.Тамир та хоёрын хувьд амьдрал дээр найзууд. Эргээд кинонд найруулагч, жүжигчний хувиар хамтарч ажиллахад ямар байдаг вэ?

-Одоо сурчихсан ш дээ. Тамираа бид хоёр чинь зүү орох зайгүй найзууд. Амьдрал дээрээ бие биеийнхээ дутууг нь нөхөж, дундуураа дүүргэдэг. Хэцүү цаг хугацаанд дандаа хамтдаа байж, аз жаргалаа ч гэсэн тэнцүү хуваадаг найзууд. Харин кино бол өөр. Тэр хүн найруулагч, би жүжигчин. Ялгаа ерөөсөө тэр. Тэгэхээр тэр хүн юу гэж хэлнэ, би тэрийг хийх ёстой.

-“Фантастик продакшн”-ы уран бүтээлүүдийн хэлэх гэсэн санаа тодорхой байдаг. “3ура 2: Цурам ажиллагаа” ямар санааг илэрхийлэх бол?

-Тэрийг үзэгчдэд үлдээе гэж бодож байна. Очиж үзээд юу хэлэхийг бодсон бол, юу дугаргахыг зорьсон бол гэдэг кинонд хэлэгдэж байгаа учир та бүхэн киногоо очиж үзээрэй. Хүн бүрийн өнцөг өөр байж магадгүй, манайхан чинь гярхай шүү дээ. Тиймээс та бүхэн киногоо үзээд илүү их ойлголт авах байх.

-“Зура 2:Цурам ажиллагаа” киноны нээлт хэдхэн өдрийн дараа болох гэж байна. Үзэгчидтэйгээ уулзах нь. Ямар сэтгэгдэлтэй байна вэ?

-Киноны нээлтэд маш олон хүн урьж байгаа. Дээрээс нь билетүүд зарагдаж байгаа. Бид нээлтийн өдөр ирэх зочдоо смоки цагаан цамц, бантикан зангиатай дресс кодтойгоор урьж байгаа. Нэлээд том хэмжээний нээлт болох байх. Нээлтийнхээ ажлыг би өөрөө хариуцдаг юм. Бүх л киноныхоо нээлтийг өөрөө хийдэг. Тиймээс онцлогтой, гоё нээлт болох болов уу гэж харж байна. The Corporate convention center-ийн гадна маш том улаан хивсний ёслол болно.Кинонд тусалсан, болон оролцсон, мөн манай продакшныг дэмждэг үзэгчид маань ирж киногоо үзнэ. Нэг талаасаа айдас байдаг. Аливаа шинэ юмыг хүлээлгэж өгнө гэдэг нэг талаасаа аз жаргал, нөгөө талаасаа айдастай байдаг. Эхлээд зрителээ харж байгаад тайвширч эхэлнэ дээ.

-Бидний урилгыг хүлээж авч ярилцсанд баярлалаа.

-Баярлалаа. Үргэлж үнэн бодит мэдээллийг эх сурвалжтайгаар хүргэж байдаг 24tsag.mn сайтын хамт олондоо баярлалаа. Манай мэдээллийн ивээн тэтгэгчээр ажиллаж байгаад туйлын их талархал илэрхийлье. “Фантастик продакшн” нэлээдгүй олон жилийн дараа та бүхэндээ ээлжит уран бүтээлээ барьж байна. Энэ уран бүтээл дээр Монголын сор болсон олон гайхалтай ах, эгч нар маань, найзууд маань хамтран ажилласан. Бүх тусалж дэмжсэн, тэвнээр ч болов тусалсан бүх хүмүүстээ баярлалаа. Тун удахгүй 2022 оны есдүгээр сарын 9-ны өдөр та бүхэндээ шинэ уран бүтээлээ хүлээлгэж өгөх нь ээ. Хүрэлцэн ирж киногоо үзээд, бидэнтэй хамтдаа байгаарай.

Т.Мөнхжаргал