Залуучуудыг хөдөлмөрт бэлтгэх “Оролцоо” төслийн 3 дугаар ээлжийн сургалт амжилттай өндөрлөлөө. Залуучуудыг хөдөлмөрт бэлтгэх “Оролцоо” төслийн 2022 оны 14 хоногийн вакумжуулсан сургалтын 3 дугаар ээлж Олон Улсын Хүүхдийн “Найрамдал” цогцолборт амжилттай зохион байгуулагдаж, өчигдөр хаалтаа хийлээ.

Хаалтын арга хэмжээнд Хөдөлмөр нийгмийн хамгааллын дэд сайд П.Зулпхар болон албаны хүмүүс оролцсон. Тэрбээр “Өөрийгөө хөгжүүлж, хөдөлмөр эрхэлж, улс орныхоо хөгжилд өөрийн оролцоо, хувь нэмрийг оруулахаар 14 хоногийн сургалтаа амжилттай дуусгаж байгаа залуучууддаа баяр хүргэе. Төслийн хугацаанд Та бүхэн ажил, хөдөлмөр эрхлэх, байнгын ажлын байртай болох, үе тэнгийн залуучуудтайгаа танилцаж, нөхөрлөж, хувь хүний ур чадвараа улам хөгжүүлж, улмаар ирээдүйдээ итгэлтэй алхаж, цаашид ажил хөдөлмөрийн гараагаа амжилттай эхлүүлэх ур чадварыг олж, хүсэл тэмүүллээр дүүрэн байгаа гэдэгт итгэлтэй байна” гээд амжилт хүсэв.

Манай Улсын нийт хүн амын 30.0 хувь, хөдөлмөрийн насны хүн амын 46.0 хувийг 15-34 насны залуучууд эзэлж байна. Тэдний ажил, хөдөлмөр эрхлэх хүсэл сонирхлыг дэмжиж, хөдөлмөрт бэлтгэх, ажилтай, орлоготой болгоход чиглэсэн төслийн энэ удаагийн ээлжид 21 аймаг, 7 дүүргийн 232 залуу хамрагдлаа.