СЭМҮТ, Монголын Сэтгэцийн Эрүүл Мэндийн Нийгэмлэг ТББ-аас COVID-19 цар тахлаас үүдэлтэй сэтгэцийн эрүүл мэндийн өнөөгийн байдал, ойрын ирээдүйд авч хэрэгжүүлэх арга хэмжээний талаар болон коронавирусийн үеийн Монгол Улсын сэтгэцийн эрүүл мэндийн байдлын талаар хийсэн судалгааг танилцууллаа. Энэ үеэр АШУҮИС-ын сэтгэцийн эрүүл мэндийн тэнхимийн багш АУ-ны доктор Т.Ганцэцэг мэдээлэл өглөө.

Тэрбээр "Дэлхий нийтээрээ ковид өвчний улмаас идэвхтэй амьдралыг хязгаарлаж эхэлсэн. Үүнтэй холбоотойгоор тухайн өрхийн орлого буурах, өвчин тусаад үхэх вий гэсэн айдас их байсан. Энэ үеэс дэлхий нийтэд сэтгэцийн асуудал тулгарч эхэлсэн. Энэ талаар одоо ч дэлхий нийтээрээ судалж байна. Цар тахал олон байсан ч ковид шиг урт хугацаанд үргэлжилж, урт хугацаанд сэтгэл зүй, хэвийн амьдралд саад учруулж байна.

Дэлхий нийтийн судалгаанаас харахад сэтгэл гутрал, сэтгэл түгшилт нь нийт хүн амын найман хувийг эзэлж байсан бол ковидын дараа 19 хувь болтлоо өссөн байна.

Бид Улаанбаатар хотын есөн дүүрэг, 21 аймгийн 330 сумаас 7919 хүнийг хамруулж, сэтгэцийн эрүүл мэндийн талаар судалгаа хийсэн. Мөн сургалт явуулсан. Сургалт, судалгааг 2021 оны арванхоёрдугаар сараас 2022 оны нэгдүгээр сар хүртэл явагдсан. Вакцинжуулалтын үе байсан.

Судалгаанд хамрагдсан нийт хүмүүсийн:

• 60 орчим хувь нь сэтгэл түгших эмгэгтэй
• 70 орчим хувь нь сульдаа хам шинжтэй
• 39 орчим хувь нь сэтгэл гутралтай байна гэсэн судалгааны үр дүн гарсан.

Судалгаанд энгийн иргэд болон, онцгой бүсэд ажиллаж буй эмч эмнэлгийн ажилчид, цагдаа, онцгой байдлыг ажилчид оролцсон. Онцгой байдлын үүрэг гүйцэтгэж буй ажилчид сэтгэл түгших эмгэг энгийн иргэдээс зургаан түвшнээр илүү байсан. Мөн Ковидоор өвдсөн хүмүүс энгийн иргэдтэй харьцуулахад 1,9 дахин их ядаргааны хам шинж үүссэн байв. Харин сэтгэл түгших эмгэг энгийн иргэдтэй харьцуулахад 1,4 дахин их байгаа нь ашиглагдсан” гэв.

Д.Батчулуун