Уншигч та бүхэнд энэ долоо хоногт болж өнгөрсөн томоохон мэдээллүүдийг түүвэрлэн хүргэж байна. Энэ долоо хоногт Боловсрол, шинжлэх ухааны яамнаас хуурамч дипломны талаар мэдээлэл өгөв. Мөн Монгол Улсын Ерөнхий сайд Л.Оюун-Эрдэнэ Дорнын эдийн засгийн VII чуулганд оролцлоо. Үүний зэрэгцээ Монгол Оросын хамтарсан гуравдугаар сургууль нийгмийн анхааралд байв.
Л.Энх-Амгалан: МУБИС нэг дипломын дугаараар гурван хүнд диплом олгосон байна
Багш нарын боловсролын баримт бичигт хийсэн шалгалтын үр дүн, үүнтэй холбоотой цаашид хэрэгжүүлэх ажлын талаар Боловсрол Шинжлэх ухааны сайд Л.Энх-Амгалан танилцууллаа. Тэрбээр “Шалгалтыг зургаан сарын турш хийлээ. Шалгалтын үйл ажиллагааг зогсоох, энэ шалгалтыг ажлын хэсэгт байсан хүмүүсийг шантаажлах, компьютерын карт хоёр удаа алдагдсан. Энэ ажлын хүрээнд нийт 71 мянган дипломыг шалгалаа.
Боловсролын салбарт 51 мянган хүний 71 мянган диплом байна. 442 диплом зөрчилтэй байгаа нь тогтоогдсон. Цаана нь хоёр мянган боловсролын бичиг баримт сэжигтэй байна.
Тухайлбал, дипломын дугаар давхацсан зөрчил 454 байна. Бусдын овог нэр, гарын үсэг, регистрийн дугаар өөрчилсөн зэрэг зөрчил байна. Тухайлбал, Боловсролын Их сургууль нэг дипломын дугаараар гурван хүнд диплом олгогдсон. Мөн бүртгэлгүй дипломын дугаар ашигласан тохиолдол 139 байна.
Энэтхэг-Монголын Найрамдлын сургуулийн шав тавилаа
Энэтхэг-Монголын Найрамдлын сургуулийг Хан-Уул дүүргийн нутаг дэвсгэр, Зайсанд барихаар өнөөдөр шав тавилаа. Шав тавих ёслолд БШУ-ны сайд Л.Энх-Амгалан, БНЭУ-ын Батлан хамгаалахын сайд Ражнат Синхг болон албаны бусад хүмүүс оролцов.
Ерөнхий боловсролын уг сургууль Энэтхэгийн Засгийн газрын буцалтгүй тусламжаар баригдах юм байна. БНЭУ-ын Батлан хамгаалахын сайд Ражнат Синхг манай улсад айлчлах үеэрээ ийнхүү шавыг тавилцлаа.
Д.Амарбаясгалан: Ж.Соронзон захирлыг чөлөөлөх тушаал гаргасан
Монгол-Оросын хамтарсан III сургуулийн захирал Ж.Соронзонг ажлаас нь чөлөөлөх болсон талаар ЗГХЭГ-ын дарга Д.Амарбаясгалан мэдээллээ. “Монгол Улсын иргэн Үндсэн хуулиар олгогдсон үндсэн эрхээ бүрэн дүүрэн эдэлдэг байх ёстой. Ялангуяа гарал үүсэл, яс үндсээрээ ялгаварлан гадуурхагдах ёсгүй.
Гэтэл Монгол-Оросын хамтарсан III сургуулийн захирал Ж.Соронзонгийн гаргаж байгаа авир Үндсэн хуулийн үзэл санаатай харшилдаж байна. Тиймээс Боловсрол, шинжлэх ухааны сайд Л.Энх-Амгалан Ж.Соронзон захирлыг чөлөөлөх тушаал гаргасан" гэв.
Монгол Улсын Ерөнхий сайд Л.Оюун-Эрдэнэ Дорнын эдийн засгийн VII чуулганд оролцож байна
Тус чуулганд Монгол Улс анх удаа Ерөнхий сайдын түвшинд оролцож байгаа юм. Ерөнхий сайд Л.Оюун-Эрдэнэ чуулганы нэгдсэн хуралдаанд оролцож үг хэлэхдээ Шинэ сэргэлтийн бодлогын боомт, эрчим хүч, аж үйлдвэрийн хөгжлийн төслүүдийн талаар танилцуулж, Монгол Улс бүс нутгийн хэмжээнд идэвхтэй түншлэн ажиллахад бэлэн гэдгээ илэрхийллээ.
Владивостокоос ирсэн онцлох гурван мэдээг эндээс уншина уу.
70 жил хаан ширээнд суусан Хатан хаан II Элизабет таалал төгслөө
Букенхемийн ордон Хатан хаан II Элизабетийг таалал төгссөн (2022.09.08) мэдээг зарлалаа. II Элизабет Хатан хаан бол Нэгдсэн Вант Улс болон Хамтын нөхөрлөлийн бусад 14 хаант улсын хатан хаан байсан юм. 70 жил Их Британийн хаан ширээнд суусан II Элизабет таалал төгссөнөөр түүний хүү Чарльз III 74 насандаа хаан болж буй юм. Хатан хаан II Элизабетийн талаархи 24 баримтыг эндээс уншина уу.
Тавантолгой-Гашуунсухайт чиглэлийн төмөр замыг нээж, өнөөдөр анхны тээвэрлэлтийг эхлүүллээ
Тавантолгой-Гашуунсухайт чиглэлийн 267 км замыг барьснаар жилд 30-50 сая тонн нүүрс зэрэг ашигт малтмал, бусад ачаа тээвэрлэж экспортлох боломж бүрдэх юм. Мөн тогтмол ажлын байр 2,000-аар нэмэгдэж, малын бэлчээр сүйтгэх, тоосжилт, хөрс, агаарын бохирдол 74 хувиар буурна гэж тооцжээ.
