24tsag.mn сайт энэ удаагийн ярилцлагын буландаа хувиараа бизнес эрхлэгч П.Мөнхсайханг онцоллоо. Тэрбээр гэр бүлийн найзуудтайгаа хамтран Улаанбаатар хотын хуучирсан шийдийг засаж, тохижуулах ажлыг өөрсдөөсөө эхлүүлжээ. Тэдний хамгийн эхний шийд Улсын их дэлгүүрийн зүүн талд цоо шинэ өнгө төрхтэйгөөр хүүхэд, залууст хүрсэн байна.
-Сайн байна уу. Манай сайтын уншигчдад өөрийгөө танилцуулаач?
-Сайн байцгаана уу. Намайг П.Мөнхсайхан гэдэг. Би “Gate 4” гэх жижигхэн рестораны үйл ажиллагаа эрхэлдэг.
-Цахим орчинд танай хамт олны тохижуулсан сагсны шийд олон хүний сэтгэлд хүрсэн байсан. Яагаад энэ шийдийг тохижуулах болов?
-Манай хамт олон нийгмийн хариуцлагын хүрээнд ажлынхаа ойролцоох сагсны талбайн хоёр шийдийг засаж, тохижуулсан юм. Өмнө нь энэ шийд хоёр жил орчим хугацаанд самбаргүй дан кольцо л байсан. Гэсэн ч хүүхдүүд ирж тоглодог. Манай ажил эндээс ойролцоо байдаг болохоор энэ хавиар явахдаа энэ шийдийг хүүхдүүдэд нэг засаад өгөх юмсан гэж боддог байсан юм. Харин саяхан цахим орчинд оруулсан пост маань олон хүнд хүрчээ. Одоо хамтраад дэмжээд ажилъя, шийдээ аваръя гэсэн олон хүмүүс холбогдож байгаад баяртай байна. Тиймдээ ч цаашид энэ ажлаа хариуцлагатайгаар хийнэ.
-Хар, шар өнгөний зохицлын хувьд ч тод, өнгөлөг харагдаж байна. Бидэнд шийдээ танилцуулаач?
-Тийм ээ. Өнгөний хувьд өөрийн гэсэн өнгө төрхтэй, хар болон шар өнгөөр хослуулсан. Мөн хандив өгч байгаа хүмүүстээ үнэ цэн үүсгэхийн тулд самбарынхаа буланд зүрхтэй, найзууд, гэр бүл, байгууллагынх нь логог хийж өгнө.
Бид шийдээ “Хамтдаа шийд” гэж нэрлэсэн. Энэ маань үйл үгээрээ бүгдээрээ хамтдаа асуудлыг шийдье гэсэн утгатай. Харин нэр үгээрээ “Хамтдаа” гэдэг нэртэй сагсны шийд юм гэсэн утга илэрхийлж байгаа. Сагсан бөмбөгийн спорт маань мөн хамтдаа тоглодог спорт шүү дээ.
Монголд сагсан бөмбөгийн спорт маш хурдтай, өндөр хэмжээнд хөгжиж байна. Хотод олон сагсны талбай, шийд бий. Гэхдээ ихэнх нь үүнтэй адил эвдэрсэн байдалтай байдаг. Тиймээс энэ талбайн эзэн хэрэгтэй байна. Надтай адил бодолтой олон залуус бий. Би зөвхөн тэдний гүүр нь болж энэ ажлыг эхлүүлж байгаа төдий.
-Ердөө хэдхэн өдрийн өмнө буюу есдүгээр сарын 10-ны өдөр шийдээ тохижуулсан байна. Энэ хугацаанд тантай холбогдож энд ийм шийд байна. Үүнийг хийе, дэмжье гэсэн хүмүүс холбогдов уу?
-Тийм ээ. Бид шийдээ тохижуулсан өдрөө цахим орчинд пост оруулсан. Одоогийн байдлаар олон хүнд хүрсэн байна. Олон хүмүүс холбогдож байна. Найзуудаараа ийлээд өсөж, төрсөн газрынхаа шийдийг тохижуулъя гэсэн 10 гаруй хүмүүс холбогдсон. Хоёр албан байгууллага холбогдож өндөр дүнтэй мөнгөөр туслахаар болсон. Харин одоо хамгийн түрүүнд бид шийдээ сонгох ёстой. Ингээд хамтарч байгаа хүмүүстэйгээ хамтдаа шийдээ засаж, тохижуулаад нэг өдрийг өнгөрөөх өдөрлөг болно. Цаашдаа долоо хоногтоо нэг шийд засна гэсэн төлөвлөгөөтэй ажиллаж байна. Мөн хөдөө орон нутгаас олон хүмүүс холбогдсон. Яг одоогийн байдлаар хол явахад хүндрэлтэй учраас санал хэлсэн.
-Шийд шинээр барьсан ч хэдэн сар болоод удахгүй эвдэрчихдэг, кольцо л үлддэг шүү дээ. Харин “хамтдаа шийд” модоор хийсэн тул бат бөх эдэлгээ удаан гэсэн. Зах зээлийн үнээр самбартай шийд худалдаж авах өөрсдөө хийх хоёр хэр ялгаатай вэ?
-Целлойдон самбартай шийд хаа сайгүй бий. Гэхдээ үнэтэй. Зөвхөн самбар нь гэхэд л 650 мянга, шийдтэйгээ хоёр, гурван сая болдог. Харин 650 мянгаар самбар авах үнээрээ төмөр рамтай, модон самбар шийдтэйгээ нийлээд 300-400 мянгад бэлэн болж байна. Тэгэхээр бид худалдаж авснаас 2-3 дахин бага үнээр илүү эдэлгээ удаан, бат бөх шийдтэй болно. Мөн энэ шийд маань дөрвөн хүн өргөхөөс нааш дийлэхээргүй хүнд. Тиймээс хулгайд алдана гэж айх зүйлгүй. Хэдхэн жилийн өмнө шийд хулгайлаад аваад явчихдаг байсан шүү дээ. Бас өөрөөр хэлбэл, Хүүхдүүд тоглож байгаад зүүгдсэн ч унахааргүй бат бөх.
Шийд тортой байх нь чухал. Энэ шийдийн торыг олс аваад өөрөө сүлжиж хийсэн. Хямд тор аваад хийвэл дороо урагдчихдаг. Тиймээс бүдүүн олсоор гараараа сүлжсэн учраас нэг хэсэгтээ л урагдана гэж санаа зоволтгүй. Хэрэв тасарвал дахиад л сүлжээд хийж өгнө.
-Самбарын буланд жижигхэн зүрхтэй лого харагдаж байна. Бидэнд логогоо танилцуулаач?
-Бид хамтдаа шийд гэдэг нэрээрээ лого хийлгэж байгаа. Сайн харвал энэ зүрхний нэг тал нь сагсан бөмбөгийн будагтай талбай, харин нөгөө тал нь сагсан бөмбөгний хээ байгаа. Нийлээд сагсаг бөмбөгт хайртай хүмүүс хайраа зориулаад үүнийг хийлээ гэсэн санаа.
-Та өөрөө сагсан бөмбөгт хэр хайртай вэ?
-Миний гэр бүлийн дараа орох хамгийн хайртай зүйл маань сагсан бөмбөг. Би 10 гаруй жил сагс тоглож байгаа. Хэдийгээр сайн сагсан бөмбөгийн тамирчин болж чадаагүй ч гэлээ энэ спортдоо хамаг бүхнээ зориулна.
Олон улсаас медаль авч ирж чадаагүй ч ирээдүйд медаль авч ирэх хүүхдүүд энэ шийдээс төрвөл миний авч болох хамгийн сайхан мэдрэмж тэр байх болно.
-Дараагийн “хамтдаа шийд” хаана байх вэ?
-Яг энэ хавь буюу их дэлгүүрийн ойролцоо яг ийм байдалтай 5-6 сагсны шийд бий. Тиймээс энэ тойргийнхоо шийдийг нэг нэгээр нь тохижуулаад дараа нь хороолол орчим, сансар, жуков орчим гэх байдлаар шийднэ гэсэн санаатай байна. Гэхдээ энэ компанит ажил маань дөнгөж эхэлж байна. Тиймээс бид өөрсдийн боломжид тааруулж ажиллана.
-Шийдийн эзэд болсон хүүхдүүд үүнийг хэрхэн хүлээж авч байна вэ?
-Тоглож байгаа хүүхдүүд бол бөөн баяр байсан. Өдөржингөө сагсны талбай дээр өнжиж байгаа харагдсан. Нэг хүүхэд бүр гүйж ирээд баярлалаа ахаа гээд орилолдоод сайхан байлаа.
-Бидний урилгыг хүлээж авсанд баярлалаа. Ярианыхаа төгсгөлийг танд үлдээе.
-Баярлалаа. Цахим орчинд “Хамтдаа шийд” гэсэн фейсбүүк хуудас, инстаграм нээсэн байгаа. Хэрэв та уншиж байвал бидэнтэй холбогдоод бодитой дэмжлэг үзүүлээрэй. Хүүхдүүдийнхээ тоглодог талбайг засахад 300 мянган төгрөгийг олуулаа хуваагаад өгөхөд энэ тийм ч их өртөг биш. Тиймээс хамтдаа хүүхдүүдээ сагсны талбайтай болгоё. Утсаа ухаад сууж байснаас бөмбөг шидэж байсан нь дээр биздээ.
Т.Мөнхжаргал
