Уншигч та бүхэнд энэ долоо хоногт болж өнгөрсөн томоохон мэдээллүүдийг түүвэрлэн хүргэж байна. Энэ долоо хоногт Паримын нуруунд гацсан уулчинг аврав. Мөн Монгол Улсын Ерөнхийлөгч ШХАБ-т оролцохоор Бүгд Найрамдах Узбекистан улсыг зорьлоо. Үүний зэрэгцээ манай улсын гурван тамирчин ДАШТ-ээс медаль хүртсэн баяр мэдээгээр энэ долоо хонгийг өндөрлүүлж байна.
Памирын нуруунд гацсан уулчин Х.Бумхишигийг авран буулгалаа
Памирын нуруунд ганцаарчилсан авиралт хийж яваад 5800 метрийн өндөрт хөлөө хөлдөөсний улмаас гацаад байсан уулчин Х.Бумхишигийг найм хоногийн дараа эсэн мэнд буулгалаа. Уулын ойр хавьд байсан бүх бааз бууж өндөрт ажиллах аврагч байгаагүй тул Монгол залуус нэгнээ аврахаар Кыргызстан улсыг зорьж, 4 хоног тасралтгүй зүтгэсний эцэст үүргээ амжилттай биелүүллээ.
Улсын аварга О.Хангайн цолны мялаалга наадамд Улсын заан Б.Пүрэвсайхан түрүүлэв
Ховд аймгийн Буянт сумын харьяат, "Аврагч" спорт хороо, “Ховд” дэвжээ, “Од” групп, "Их Монгол", “СанЭм Жи Ө транс” компанийн бөх О.Хангайн Монгол Улсын аварга цол хүртсэний талархал хүндэтгэлийн наадам Ховд аймгийн төв Жаргалант суманд боллоо.
Хүндэтгэлийн наадамд улсын гарьд Ө.Бат-Орших, улсын заан Б.Пүрэвсайхан, Н.Жаргалбаяр, Б.Серик, улсын харцага Н.Золбоо, Н.Батзаяа, О.Мөнх-Эрдэнэ, Б.Цэдэнсодном, Ш.Пүрэвгарьд, Ц.Бямба-Отгон тэргүүтэй улс, аймгийн алдар цолтой 128 бөх барилдлаа.
Уг наадамд Ховд аймгийн Чандмань сумын харьяат улсын заан Б.Пүрэвсайхан түрүүлж, Баянхонгор аймгийн Баянбулаг сумын харьяат улсын харцага Нацагсүрэнгийн Золбоо үзүүрлэлээ.
Цементийн импортын татварыг энэ оныг дуустал тэглэлээ
Засгийн газрын ээлжит хуралдаан үргэлжилж байна. Хуралдааны үеэр Сангийн сайд Б.Жавхлан цементийн импортын татварыг он дуустал тэглэх саналыг оруулжээ.
Засгийн газар уг саналыг хэлэлцэж, дэмжсэн байна.
Монгол Улсын Ерөнхийлөгчийг Узбекистаны Ерөнхий сайд угтан авлаа
Монгол Улсын Ерөнхийлөгч Ухнаагийн Хүрэлсүх Шанхайн хамтын ажиллагааны байгууллага (ШХАБ)-ын гишүүн орнуудын Төрийн тэргүүн нарын зөвлөлийн өргөтгөсөн хуралдаанд оролцохоор Бүгд Найрамдах Узбекистан Улсын Самарканд хотод хүрэлцэн ирлээ.
Монгол Улсын Ерөнхийлөгчийг Самарканд хотын олон улсын нисэх буудалд хүрэлцэн ирэхэд хүндэт харуулын цэрэг жагсаж, узбекийн талаас Бүгд Найрамдах Узбекистан Улсын Ерөнхий сайд А.Н.Арипов, монголын талаас Монгол Улсаас Бүгд Найрамдах Узбекистан Улсад суугаа Онц бөгөөд Бүрэн эрхт Элчин сайд Д.Баярхүү тэргүүтэй албаны төлөөлөгчид угтав.
Чөлөөт бөх: Д.Отгонжаргал, Б.Хулан нар дэлхийн мөнгөн медальтан болов
Чөлөөт бөхийн насанд хүрэгчдийн ДАШТ-ий эмэгтэйчүүдийн хамгийн хөнгөн жин 50 кг-д ОУХМ Д.Отгонжаргал өнгөрсөн жилийн Ослогийн дэлхийн медалиа ихэрлүүлж Белградад мөнгөн медаль зүүв.
Мөн 53 кг-ын жинд үндэсний шигшээ баг, “Аврагч” спорт хорооны тамирчин ОУХМ Б.Хулан мөнгөн медаль хүртлээ.
Сүхбаатарын талбайд номын баяр эхэллээ
Үндэсний номын баярыг энэ жил 32 дахь удаагаа зохион байгуулж байна. Энэ удаагийн номын баярын үндсэн үйл ажиллагаа Д.Сүхбаатарын талбайд өнөөдөр 13 цагаас нээх юм. "Илүү их уншъя" уриатайгаар зохион байгуулж буй "Номын баяр 2022" арга хэмжээ нь бүх нийтийн уншлагыг дэмжих, номын сангийн өв санг арвижуулах, үндэсний бичиг соёлыг сурталчлах, хүүхэд залууст ном эрдмийг түгээн дэлгэрүүлэх зорилготой
Чөлөөт бөх: М.Лхагвагэрэл дэлхийн аваргаас мөнгөн медаль хүртлээ
Чөлөөт бөхийн эрэгтэйчүүдийн 125 кг-ын жинд ОУХМ Мөнхтөрийн Лхагвагэрэл Белградын дэвжээний финалд Турк Улсы бөх Таха Акгюльтэй хүч үзэж 6:2-оор хожигдож, мөнгөн медалийн эзэн боллоо.
