БНСУ-ын Засгийн газрын шийдвэрээр Монгол, Вьетнам, Филиппин, Индонез зэрэг зарим улсын бүлэг жуулчид Солонгосын Ганвон мужийн Яньян олон улсын нисэх онгоцны буудлаар дамжин 15 хүртэл хоног визгүй зорчих боломжтой болсон. Тэгвэл ирэх аравдугаар сарын 1-нээс эхлэн хэрэгжиж эхэлнэ.

Сонирхуулахад, 15 хоног визгүй зорчихын тулд зөвхөн Яньян олон улсын нисэх онгоцны буудалд буух бөгөөд тав буюу түүнээс дээш хүний бүрэлдэхүүнтэй аялалын баг болж нэг авиакомпанийн нислэгээр бүгд ирж, бүрэн бүрэлдэхүүнээрээ эх орондоо буцах шаардлагатай. Мөн үүнээс гадна зөвшөөрөгдсөн аялал жуулчлалын агентлагаар дамжуулан аяллын хөтөлбөр төлөвлөсөн байх нь.

Ийн аялах иргэд Коронавируст халдвар /Ковид-19/-ын эсрэг вакцины бүрэн тунд хамрагдсан байх, халдвар хамгааллын дэглэмийг чанд мөрдөх, орон нутгийн ажилтан дагалдах бол түүнтэй холбоотой үйлчилгээний хөлс төлөх, хилээр нэвтрэхэд хувийн болон шаардлагатай бусад мэдээллээ өгөхийг зөвшөөрсөн байх шаардлагатай.

Энэхүү түр хугацааны визгүй аялал нь зөвхөн Ганвон муж болон Сөүл хотод аялах боломжтойг анхаарна уу.

Энэхүү хөнгөлөлттэй нөхцөлөөр Солонгост визгүй зорчсон хэдий ч тус улсын нутаг дэвсгэрийг орхин гараагүй, хугацаа хэтрүүлсэн иргэдийн тоо зорчсон нийт монгол иргэдийн таван хувиас давсан даруйд уг шийдвэр цуцлах аж. 

М.Сүхэхэй