“Парламентын боловсрол-Сургагч багш” хөтөлбөрийн нээлтийн арга хэмжээ болж байна. Энэ үеэр УИХ-ын дарга Г.Занданшатар үг хэллээ.

Тэрбээр "Парламентын боловсрол бол дэлхий нийтийн Ерөнхий боловсролын чиг хандлага болоод удсан. Энэ бол үндсэн хуулийн үйл хэрэг, төр засгийн үйл хэрэг, ардчилсан тогтолцооны талаарх мэдлэг мэдээллийг ард иргэддээ өгч, иргэний боловсролыг дэмжих нь ардчиллыг төлөвшүүлэх ардчиллын боловсролын суурь үндэс гэж үздэг. Дэлхийн олон улс орнуудад хүний эрхийн боловсрол, үндсэн хуулийн боловсролыг зааж байна. Аристотель нэгэнтээ “иргэн хүн гэдэг бол төрийн үйл ажиллагаанд оролцох үүрэгтэй хүнийг хэлнэ. Тийм итгэл зүтгэлтэй байх хэрэгтэй” гэсэн утгатай үг хэлсэн байдаг. Тиймээс үүний үр дүнд парламент ямар байх нь шалтгаалдаг.

Сонгууль, сонгосон хүн нь ямар байр ард түмнээс шалтгаална. Парламентыг бага ард түмэн гэж нэрлэдэг. Олон өнгө үзэл бодлыг илэрхийлж байж төрийг хуулиар жолоодох үүрэг хэрэгжинэ. Үндсэн хуулийн эх баригч Б.Чимэд “Хэн нэгэн биш хуулиар төрийг жолоодох төрийн тогтолцооны мөн чанарыг харуулахын тулд Монгол улсын үндсэн хуульд УИХ-ыг төрийн эрхийг барих дээд байгууллага хэмээн тодорхойлсон” гэсэн байдаг.

Олон чиглэлүүдээс харахад сонгуулийн боловсрол, ардчиллын боловсрол дутмаг байдаг. Иргэний боловсролын хичээлийн төсөл хөтөлбөрийг Боловсролын яам хэрэгжүүлж байгаа. Гэсэн хэдий ч мэргэжлийн багш байхгүй, сургагч багш нарыг бэлтгээгүйн улмаас хүүхдүүдийн мэдлэг муу байна. Тиймээс олон улсын ардчилсан жишиг хандлага хараад энэхүү хөтөлбөрийг 2021 оноос эхлэн хэрэгжүүлж байна. Сургалтад оролцож буй багш сурган хүмүүжүүлэгч нарт болон оролцож хамтран ажиллаж буй бүх хүмүүст УИХ болон хувиасаа талархал илэрхийлье” гэв.

Д.Батчулуун