Ирэх аравдугаар сарын 1-нээс эхлэн Монгол Улсын иргэд БНСУ-ын Яньян хотод 15 хоног визгүй зорчих боломжтой болсон. Яньян нь аялж, амрахад хамгийн тохиромжтой хот бөгөөд таныг сэргээх байгалийн үзэсгэлэнт газрууд олон бий.  Бид энэ дугаарт Яньян хотоос заавал үзэх таван зүйлийг нэрлэлээ. 

Яньян бол аялахад хамгийн тохиромжтой хот. БНСУ-ын зүүн эрэгт Гангвонду мужид байрлах Яньян хот нь 628.6 км2 нутаг дэвсгэртэй, 30 мянга орчим хүн амтай. Аялахад хамгийн тохиромжтой гэдэг нь, далайн эрэг, наран шарлагын газар бүхий жуулчдыг хамгийн ихээр татдаг бүс юм.

Учир нь эндээс мандаж байгаа нар хамгийн үзэсгэлэнтэй харагддаг. Тийм ч учраас өглөөний нарыг харах гэж дэлхийн өнцөг булан бүрээс жуулчид ирдэг байна.

Хэрэв та далайн бүтээгдэхүүн, загасанд дуртай бол Яньян танд тохирно гэж найдаж байна. Учир нь нарс мөөг, хөлдөөж хатаасан загас, тэр дундаа хулд буюу салмон загасаараа алдартай. Жил бүрийн аравдугаар сарын эхэнд нарсны мөөгний баяр гэж болдог бол, арван нэгдүгээр сард хулд загасны наадам болдог. Хулд загас нь өөрөө хамгийн цэнгэг усанд сэлдэг бөгөөд Солонгосын хамгийн том цэнгэг гол болох Намдечон голын эрэгт энэхүү наадам болдог аж. Энд ирснээр хулд загасыг гараараа барих боломжтой гэнэ шүү.

Хулд загас нь витамин В, В12, натри, кальци, хүхэр, фосфор, омега зэрэг олон төрлийн шим тэжээлтэй бөгөөд бусад загасанд агуулдгаас хэд дахин их омега 3 агуулдаг байна.

Мөн энэ хот үзэсгэлэнтэй далайн эргээрээ алдартай. Наксанса, Наксан, Осан, Хажодае, Ингу, Жигён зэрэг томоохон далайн эргүүд бий. Мөн сонирхуулахад, Яньян олон шашинтай хот. Буддизм, Бөө мөргөл, Протестант, Ромын Католик зэрэг шашин байдаг бөгөөд Күнзийн сургаалыг дагадаг хүмүүс ч бий. Энэ ч утгаараа зарим далайн эргэ нь буддын шашны холбогдолтой байх нь бий. Жишээлбэл, Наксанса далайн эрэгт буддын сүм байрладаг байна.

Яньянаас Сөүл хүртэл автобусаар 2-3 цаг яваад хүрэх боломжтой. Далайн эргээс гадна өөр томоохон хотуудаар аялахыг хүсвэл ердөө орон нутгийн автобусанд суугаад л хэдхэн цаг явахад хангалттай. 

Солонгосдоо алдартай халуун рашаан энд бий. Сеораксан ууланд байрлах Осаекийн карбонатлаг халуун рашаан нь "хамгийн сайхан" халуун рашаан хэмээн нэрлэгддэг гэнэ. Энд ирснээр алжаал, ядаргаа тайлах рашаанд суух боломжтой. 

Т.Мөнхжаргал