Монголын гурилан бүтээгдэхүүн үйлдвэрлэгчдийн холбооноос гурилан бүтээгдэхүүний үнэ нэмэгдэж байгаа талаар мэдээлж байна.
Тэд мэдээлэлдээ "Гурил үйлдвэрлэгчид бол хүн амын өдөр тутмын хүнсний хэрэгцээг хангаад зогсохгүй, хүн амаа эрүүл аюулгүй хүнсээр хангах үйл ажиллагаа явуулдаг. Цар тахлын дараах эдийн засгийн хүндрэл ихээр нөлөөлж байна. Харин сүүлийн хоёр гурван жилийн хувьд хүндрэлтэй нөхцөл байдал бий болсоор байна. Өнөөдөр ч хүндрэлтэй нөхцөл байдал бий болоод явж байна. Монгол Улсын хэмжээнд гурилан бүтээгдэхүүний 900 орчим үйлдвэр, цех үйл ажиллагаа явуулж байна. Тэдгээрт 30 орчим мянган хүн ажиллаж байна. Эдгээр үйлдвэрээс борлуулалт зогсох, хаагдах нөхцөл байдал бий болсон. Цар тахалын үед гурилан бүтээгдэхүүн үйлдвэрлэгчид ард иргэдээ хүнсээр тасардуулахгүй, гал алдахгүй ажилласан.
Өдөр ирэх тусам хүнсний барааны үнэ нэмэгдэж байна. Мөн адил гурилан бүтээгдэхүүний салбарт үнийн асуудал давагдашгүй хүчин зүйл боллоо. Тиймээс гурилан бүтээгдэхүүний үнийг 30-50 хувь нэмнэ.
Гурилан бүтээгдэхүүний үнэ нэмэгдэх болсон шалтгааныг тайлбарлая. Хил гаалийн ойлгомжгүй байдал, тээвэр ложистикийн доголдол зэрэг асуудлыг улмаас гурилан бүтээгдэхүүний үнэ нэмэгдэж байна. Хил гаалиар бараа бүтээгдэхүүн хэзээ орж ирэх нь тодорхойгүй.
Тээврийн үнэ өссөн - Хоёр жилийн өмнө гурилан бүтээгдэхүүн үйлдвэрлэгчид Эрээнээс Улаанбаатар руу шууд тээвэр хийдэг байсан. Гэтэл өнөөдөр Эрээн-Замын-Үүд, Замын-Үүд-Улаанбаатар гэсэн хоёр маршруттай болсон. Мөн тээврийн үнэ хоёр, гурав дахин нэмэгдсэн.
Шатахууны үнэ мөн нөлөөлж байна - Гурилан бүтээгдэхүүн үйлдвэрлэхэд шатахууны үнэ ямар хамаатай юм бэ гэж хүмүүс хэлдэг. Гэтэл энэ салбар жилийн 365 хоног тасралтгүй ажилладаг. Хүргэлтийн бүх машинууд дизель түлш хэрэглэдэг. Гэтэл дизель түлшний үнэ бас нэмэгдсэн.
Валютын ханшийн өсөлт - Хүнсний үйлдвэрлэгчид түүхий эд, туслах бүтээгдэхүүнээ гаднаас авдаг учир төлбөр тооцоогоо валютаар хийдэг. Валютын ханшийн зөрүүний улмаас бид маш их алдагдал хүлээж байна.
Мөн хүнсний салбарт ажиллах хүчний дутагдал үүслээ. Хүнсний салбарт ажиллах нарийн мэргэжлийн боловсон хүчин алга байна” гэв.
Д.Батчулуун
