Монголын Үйлдвэрчний эвлэлийн холбоо УИХ-аар хэлэлцэх 2023 оны "Улсын төсөв"-ийн талаар байр сууриа илэрхийлж байна. Энэ үеэр Монголын Үйлдвэрчний Эвлэлийн Холбооны Дэд Ерөнхийлөгч С.Эрдэнэбат мэдээлэл өглөө.

Тэрбээр "МҮЭХ 2023 оны төсөв, ард иргэд, ажил хөдөлмөр эрхэлж буй хүмүүсийн бодит орлогыг нэмэгдүүлэх вэ гэдэг асуудал бидний хувьд маш чухал байна. 2021 онд инфляц 13 хувь, 2022 онд 17,18 хувь. Нийтдээ 30 орчим хувь байгаад байна. Ирэх жил мөн инфляц биднийг хүлээж байна. Тийм учраас хүмүүсийн цалингийн бодит худалдан авах чадварыг хадгалах арга хэмжээ чухал байна. Дор хаяж 20,30 хувь нэмэгдүүлж байж цалин хөлсийг худалдан авах чадварыг хэвээр нь хадгална. Тиймээс бид энэ зүйлийг зайлшгүй ярих шаардлагатай байна.

Хоёрдугаарт, өрхийн орлогод нэмэр болж буй хэд хэдэн зүйл байна. Тухайлбал, хүүхдийн мөнгө. 50 орчим мянган өрх чинээлэг гэж үзээд хүүхдийн мөнгө авдаггүй юм байна. 3 сая төгрөгийн орлоготой өрхийн хүүхдийн мөнгийг хасна гэж яригдаад байгаа. Энэ байж болохгүй зүйл. Бага ч гэсэн нэмэр болж байгаа. Цалин хөлснөөс гадна нэмэлт орлогыг нэмэгдүүлэхэд төр засаг сайн зөвшилцөж, оновчтой шийдвэр гаргаач хэмээн хүсмээр байна.

Мөн хүн амын орлогын албан татварыг хөнгөлөх хэрэгтэй байна. Харин өндөр орлоготой, чинээлэг хэсгээсээ өндөр татвар авах нь олон улсын жишиг. Гэтэл сая төгрөгийн цалинтай хүмүүс 10 хувийн татвар төлдөг жишиг манайхаас өөр улсад байхгүй.

Хувийн хэвшлийн салбарт ажиллаж байгаа маш олон ажилчид бий. Ажлын байраар хангаж байгаа, орлоготой болгож байгаа хувийн хэвшлийнхнийг дэмжих хэрэгтэй байна. Цаасан дээр байдаг, дундын компаниуд тендерийг нь түүчихдэг. Ийм асуудал бий. Мөн хөдөлмөрийн үнэлэмжийн уналт хүний нөөцийн гарах урсгалыг нэмэгдүүлж байна. Гадаад руу маш олон залуучууд гараад явж байна . Энэ нь өөрөө үндэсний аюулгүй байдалтай холбоотой асуудал болон хувирч байна. Тиймээс энэ асуудал дээр шинэ сэргэлтийн бодлогыг цалин хөлс хөдөлмөрийн үнэлэмжийн сэргэлтийн бодлогыг хэрэгжүүлэх шаардлагатай байна гэдэг санал шаардлагыг хүргүүлж байна” гэв.

Д.Батчулуун