Хүний эрхийн Үндэсний Комиссын дарга Ж.Хунан, Комиссын гишүүн С.Дондов, Б.Энхболд нар НҮБ-ын Дур зоргоор баривчлан саатуулах асуудлаарх ажлын хэсгийн гишүүн Элина Стейнерте, Мэтью Гиллетт тэргүүтэй төлөөлөгчдийг өнөөдөр /2022.10.05/ хүлээн авч уулзлаа.

Уулзалтаар Комиссын дарга Ж.Хунан Монгол Улсын хүний эрхийн талаарх хууль тогтоомжид орсон шинэчлэл, Комиссын чиг үүрэг, Монгол Улс дахь хүний эрх, эрх чөлөөний байдлын талаарх 20, 21 дэх илтгэл, Мендезийн зарчмуудыг нэвтрүүлэх талаар бэлтгэл ажлыг ханган ажиллаж байгаа талаар танилцуулж, эрүүгийн хэрэг хянан шалгах ажиллагааны явцад сэжигтнийг баривчлах, яллагдагч, шүүгдэгчийг цагдан хорих хугацаа, Улсын Их Хурлаас 2021 онд баталсан Өршөөл үзүүлэх тухай хуулийн талаар санал солилцов.

НҮБ-ын Дур зоргоор баривчлан саатуулах асуудлаарх ажлын хэсгийн гишүүд 2022 оны 10 дугаар сарын 03-наас 14-ний өдрүүдэд манай улсад айлчлах хугацаандаа Улаанбаатар хот болон орон нутаг дахь төрийн болон иргэний нийгмийн байгууллагын төлөөлөгчидтэй уулзан Ажлын хэсгийн бүрэн эрхийн хүрээнд санал солилцож, зөвлөмж гаргах юм.

Ажлын хэсэг 2022 оны 10 дугаар сарын 14-ний өдрийн 12:00 цагаас НҮБ-ын хурлын танхимд хэвлэлийн бага хурал зохион байгуулж, урьдчилсан ажиглалт, дүгнэлтээ танилцуулна.

Ташрамд дурдахад, НҮБ-ын Дур зоргоор саатуулах асуудал хариуцсан Ажлын хэсгийг бусдын эрх чөлөөг үндэслэлгүй, дур зоргын үндсэн дээр хассан гэх хэрэг маргааныг шалгах зорилгоор Хүний эрхийн комисс (хуучин нэрээр)-ын шийдвэрээр 1991 онд байгуулжээ.

Улмаар Комиссын зүгээс орогнол хүсэгчид, цагаачдыг захиргааны журмаар саатуулах асуудлыг хамруулан Ажлын хэсгийн эрх хэмжээг тодорхойлж өргөтгөсөн байна. Өнгөрсөн 2019 оны 09 дүгээр сард Хүний эрхийн зөвлөл нь тус Ажлын хэсгийн бүрэн эрхийн хүрээг баталгаажуулж, дахин гурван жилээр сунгажээ. Ажлын хэсэг нь дэлхийн бүс нутгийн төлөөллийг хангасан бие даасан таван шинжээчийн бүрэлдэхүүнтэй.

Үүнд: Хатагтай Мириам Эстрада-Кастило (Эквадор; Ажлын хэсгийн дарга), ноён Мумба Малила (Замби; Дэд дарга); Хатагтай Элина Штайнерте (Латви); Хатагтай Прия Гопалан (Малайз); ноён Мэттью Жиллет (Шинэ Зеланд).

Ажлын хэсэг нь Хүний эрхийн зөвлөлийн Тусгай журам /Special Procedures/ хэмээн нэрлэгддэг механизмд хамаардаг.

НҮБ-ын Хүний эрхийн тогтолцооны хамгийн олон хараат бус шинжээчдийг хамарсан тогтолцоо болох Тусгай журам нь дэлхийн өнцөг булан бүрт улс орнуудын тодорхой нөхцөл байдал эсхүл сэдэвчилсэн асуудлын талаар хараат бусаар баримт цуглуулах, хяналт үнэлгээ хийх Зөвлөлийн механизмын ерөнхий нэр юм.

Тусгай журмын шинжээчид сайн дурын үндсэн дээр ажилладаг. Тэд НҮБ-ын ажилтан биш бөгөөд тухайн ажлын төлөө цалин хөлс авдаггүй. Шинжээчид аливаа Засгийн газар, байгууллагаас хараат бус бөгөөд бие даасан байдлаар үйл ажиллагаа явуулдаг.