Эрдэнбүрэнгийн усан цахилгаан станцын асуудлаар мэргэжлийн судлаач, шинжээч, төслийн нэгжийнхэн тайлбар, мэдээлэл өглөө. 

Эрдэнэбүрэнгийн усан цахилгаан станцын төслийн зохицуулагч Ч.Гантулга "Шинээр үүсэх усан сан 9871 га газрыг хамрах юм. Улсын хэрэгцээнд 2019 оны 357 дугаар тогтоолоор 28 мянган га газрыг тусгай хэрэгцээнд авсан. Засгийн газар, Монгол Улсын төр аль ч ангиллын өөрийн мэдлийн газрыг стратегийн том бүтээн байгуулалтад авч хэрэглэх эрх нь нээлттэй.

Зарим ташаа мэдээлэл явж байгаа нь иргэдийг амьдрах газаргүй болгох гэж байна, живүүлэх гэж байна гээд байгаа. Харин 28 мянган га газрын 9871 га газарт нуур үүснэ. Энэ талбайг чөлөөлөх тухай асуудлыг ярьж байгаа болохоос биш иргэдийг энэ жилдээ нүүлгээд, хөөж байгаа асуудал огт байхгүй.

Эсэргүүцэл үзүүлж байгаа нэр бүхий иргэдтэй уулзаж, ярилцахаар оролдож байгаа. Гэвч сонсдоггүй, турхирдаг, хурал бусниулдаг. Усан цахилгаан станц нь дараах гурван аймгийн дөрвөн сумын нутгийг хамарч байна. Баян-Өлгий аймагт 104 кв.км, Увс аймгийн Өмнөговь сумын Улиас багт 123кв.км, Ховд талын чацаргана баг буюу Мянгад суманд 46 км, Эрдэнэбүрэн сумын 5.5 кв.км газар бий. Нуур үүсэх 9,871 га талбай нь 4-4.5 км-ийн өргөнтэй, 23 км урттай. Энэ нуур үүсгэх талбайд өртөж буй айлуудыг 4-5 км-ийн зайд нүүх асуудлыг яриад байгаа юм. Харин иргэдийг нутгаас нь хөөсөн асуудал огт байхгүй" гэв.

Мөн багийн төвийг ойролцоо бүсэд шинээр байгуулна. Энэ бол шинэ бүтээл байгуулалт. Үүний төсвийг улсын төсвөөс шийдүүлэхээр ажиллаж байна. Харин нөлөөлөлд өртөж буй 1,241 иргэнд тус бүр 15.2 сая төгрөгийн нөхөн олговор олгохоор шийдвэрлэсэн" гэв.

М.Сүхэхэй