Чингэлтэйд үйлдвэрлэв 2022” чуулга уулзалт болж байна. Энэхүү уулзалтад Чингэлтэй дүүргийн жижиг, дунд үйлдвэрлэгчид оролцож байна. Чингэлтэй дүүргийн засаг дарга Н.Батсүмбэрэл чуулга уулзалтыг нээж хэлсэн үгэндээ ирэх 2023 оныг "үйлдвэрлэлийг дэмжих жил" болгон зарлаж байгаагаа мэдэгдлээ.
Тэрбээр “Нийслэлийн Чингэлтэй дүүргийн 30 жилийн ойн хүрээнд 2022 оныг "бүтээн байгуулалтыг дэмжих жил" болгон зарласан. Энэ хүрээнд дүүргийн жижиг, дунд үйлдвэрлэгчдэд төрөөс үзүүлж буй бодлогын дэмжлэг, хууль эрх зүйн зохицуулалт, салбарын цаашдын хөгжлийг тодорхойлох, үйлдвэрлэгчдийн бараа бүтээгдэхүүнийг сурталчлан таниулах зорилгоор энэхүү форумыг зохион байгуулж байна.
Нэг үеэ бодоход хүн амын дунд жижиглэн худалдаа, ахуйн үйлчилгээ, хүнсний гол нэрийн бүтээгдэхүүн үйлдвэрлэл, оёдол, сүлжмэл, модон эдлэл зэрэг үйлдвэрлэлүүд шинээр идэвхтэй хөгжиж байна.
Чингэлтэй дүүргийн жижиг, дунд үйлдвэрлэлийг дэмжих төвд өнөөдрийн байдлаар 815 үйлдвэрлэл эрхлэгчид бүртгэлтэй байна.
Манай дүүргийн ИТХ-аас 2021 онд “Чингэлтэйд үйлдвэрлэв 2024” арга хэмжээг дөрвөн зорилтын хүрээнд 26 үйл ажиллагаатайгаар баталсан. Энэ хүрээнд 2022 онд бүтээн байгуулалтын хувьд удаашралтай байгаа ажлууддаа анхаарч, асуудлыг шийдэж байна. Юун түрүүнд эрүүл мэндийн салбарт анхаарлаа. Дүүргийн эрүүл мэндийн төв 2017 онд барихаар төлөвлөсөн ч газаргүйн улмаас хойшлоод байсан. Иймд ИТХ-аас 6.8 тэрбум төгрөг төсөвлөж Чингэлтэй дүүргийн аравдугаар хороонд 2.8 га газарт шинэ эмнэлэг барихаар болсон. Энэ эмнэлэг бол дүүргийн иргэд, үйлдвэрлэгчдэд үйлчлэх орчин цагийн шинэ эмнэлэг байх болно.
Мөн эрт оношилгооны төв, Хайлааст дахь амбулаторийн ажлыг эрчимжүүлэх чиглэлээр үйл ажиллагааг шат дараалан хийж байна. Өнгөрсөн жил бид боловсролын салбарт илүү анхаарал хандуулсан. Дутуу баригдсан сургууль, цэцэрлэгийн барилгыг түргэн шуурхай үргэлжлүүлж, үйл ажиллагаанд оруулах, сургуулийн орчны аюулгүй байдлыг хангах, сургуулийн барилгын чанарыг сайжруулах чиглэлээр ажиллаа.
Ирэх 2023 оныг “Үйлдвэрлэлийг дэмжих” болгон зарлаж байгаа. Үйлдвэрлэл эрхлэгчдэдээ анхаарсан ажлыг эрчимтэй хэрэгжүүлнэ. Цаашид жижиг, дунд үйлдвэрлэлийг дэмжихдээ, дотоодын болон гадаадын хамтын ажиллагааг эрчимжүүлэх чиглэлээр хамтарч ажиллана. Япон, БНСУ, БНТУ, ОХУ зэрэг ойролцоох улсад дотоодын үйлдвэрлэгчийн бүтээгдэхүүнийг борлуулах чиглэлд идэвхтэй ажиллах болно" гэв.
Т.Мөнхжаргал
