Засгийн газрын тогтоолоор Монголын уул уурхайн баялаг хяналтгүй болсон талаар "Геологийн төв лаборатори” ТӨҮГ-ын Үйлдвэрчний эвлэлийн хорооноос мэдээлэл хийлээ.

"Геологийн төв лаборатори"-ийн үйлдвэрчний эвлэлийн хорооноос дараах байр суурийг илэрхийлж байна.

С.Биндэръяа "Наймдугаар сарын 24-нд Геологийн судалгааны төв, Геологийн төв лаборатори ТӨҮГ-ыг нийлүүлэн “Геологийн судалгаа, шинжилгээний төв” ТӨААТҮГ болгож өөрчлөн зохион байгуулах тухай Засгийн газрын 317 дугаар тогтоол гарсан.

Геологийн төв лаборатори нь 105 улсад хүлээн зөвшөөрөгдсөн, хүчин төгөлдөр үйл ажиллагаа явуулдаг чанартай лаборатори юм. Гэтэл дээрх хоёр газрыг нэгтгэснээр олон улсын итгэмжлэл авсан “Геологийн төв лаборатори” гэдэг нэр маань байхгүй болохоос гадна итгэмжлэлийн гол шалгуур болох “бие даасан, хараат бус байдал” алдагдахад хүрч байна. Бид “Геологийн төв лаборатори” гэх сайхан нэрээ түүхийн хуудаснаас арчуулмааргүй байна.

Яагаад лабораторийн итгэмжлэлийн хараат бус, бие даасан байдал чухал вэ гэвэл, уул уурхайн бүтээгдэхүүний экспортын татвараар улсын төсвийг бүрдүүлдэг.

Нэгдүгээрт, худалдан авагч талд хүлээн зөвшөөрөгдөхүйц баталгааг өөрсдөө гаргадаг. Хэрэв энэ үр дүн байхгүй бол худалдан авагч тал болон олон улсад бидний үр дүн хүлээн зөвшөөрөгдөхгүй.

Хоёрдугаарт, бид гадны хөрөнгө оруулалтаар, хамтарсан хувь эзэмшлээр уул уурхайн ажил цааш үргэлжилдэг. Тиймээс хамтарсан компани, гадны хувь эзэмшлийн компаниудын манай улсаас гаргаж байгаа уул уурхайн бүтээгдэхүүний экспортын хяналтыг хэрхэн тавих вэ гэдэг асуудал үүсч байгаа юм. Дээрх хоёр байгууллага нэгдсэнээр эдгээр асуудлууд гарч ирнэ” гэв.

Т.Мөнхжаргал