Уншигч та бүхэнд энэ долоо хоногт болж өнгөрсөн томоохон мэдээллүүдийг түүвэрлэн хүргэж байна. Энэ долоо хоногт УИХ-ын намрын ээлжит чуулган нээлтээ хийж, ДАШТ-ээс хос медаль хүртсэн үйл явдлууд болж өнгөрлөө.
"УИХ-ын намрын чуулган нээлтээ хийв"
УИХ-ын 2022 оны намрын ээлжит чуулган Төрийн ордонд нээлтээ хийлээ. Нээлтийн онцлох үйл явдлаас дурдвал, УИХ-ын гишүүн Д.Ганбат чуулганы танхимд эсэргүүцлээ илэрхийлж гишүүний үнэмлэхээ УИХ-ын даргын ширээн дээр тавьсан. Харин УИХ-ын дарга Г.Занданшатар түүнд чуулган үймүүлсэн гэж сануулга өгөв. Д.Ганбат гишүүн энэ талаар тайлбарлахдаа “Энэ Улсын Их Хурал ямар ч ёс зүй, ёс суртахуунгүй Улсын Их Хурал болсон. Ард түмний итгэл найдвар, өргөсөн тангарагтаа үнэнч биш байна. Иймд АН болон миний бие ард түмэнтэйгээ хамт даварсан эрх баригчдыг даруулгатай, замбараатай болгохын тулд ажиллаж эхэлнэ” хэмээсэн. Мөн энэ үеэр Ардчилсан намын бүлгийн гишүүд эдийн засгийн хямрал, төгрөгийн ханшийн уналт, бараа бүтээгдэхүүний үнийн өсөлт зэрэг 13 хямралыг бодитоор дэлгэн харууллаа.
"ТӨСӨВ 2023"
Аравдугаар сард чуулганы хуралдаанаар хэлэлцэх гол асуудал нь Төрөөс хэрэгжүүлж байгаа мөнгөний бодлого болон ирэх оны төсвийн тухай хуулийн төслийг хэлэлцэх юм. Ирэх оны төсөвт Засгийн газрын тусгай сангуудад зургаа тэрбум төгрөг төсөвлөсөн бол уул уурхайн голлох түүхий эдийн үнэ буурах төлөвтэй байна. ХҮН-ын зүгээс Монгол Улсын 2023 оны төсвийн төсөлд арван дүгнэлт, таван зөвлөмж өгсөн. Тэгвэл энэ сарын 17-ныг хүртэл бүх нийтий санал асуулга явуулж аравдугаар сарын 19-нд нээлттэй хэлэлцүүлэг өрнүүлэхээр боллоо.
"МҮИС гэх нэр МУИС-д хадгалагдахаар болов"
Боловсрол, шинжлэх ухааны сайд Л.Энх-Амгалан Монгол Улсын их сургууль, Монголын үндэсний их сургуулийн талаар мэдээлэл өглөө. Тэрбээр "Монгол Улсад орчин цагийн дээд боловсролын тогтолцоо үүссэний 80 жилийн ой тохиож байна. Энэ түүхийг МУИС бүтээсэн. 1992 онд Ардын их хурлын тогтоолоор МУИС-ийн нэрийг Монголын үндэсний их сургууль гэж нэрлэсэн. Тэгэхээр энэ нэр МУИС-ийн оюуны өмч гэсэн үг учраас хэн нэгэн этгээд хууль бус үйлдлээр өмчилж, ашиглаж болохгүй. Энэ бол гэмт хэрэг. Тиймээс МҮИС гэдэг нэр МУИС-д хадгалагдаж үлдэнэ” гэв.
"Гурилын үнэ нэмэгдэв"
Энэ долоо хоногт гурилын үнэ өмнөх долоо хоногоос 4.8 хувиар өссөн. Энэ үнэ цаашид шат дараатайгаар өснө гэдгийг гурил үйлдвэрлэгчид мэдээлсэн. Тэгвэл улаанбуудайн үрийн үнэ болон шатахууны үнэ нэмэгдсэнээр гурилын үнэ өсөх шалтгаан болжээ. Улмаар цаашлаад талх болон гурилан бүтээгдэхүүний үнэ ч дагаад өссөн байна.
"ДАШТ: Ц.Цогтбаатар дэлхийн аварга болж
Л.Энхрийлэн хүрэл медаль хүртэв"
Жүдо бөхийн насанд хүрэгчдийн дэлхийн аварга шалгаруулах тэмцээний эрэгтэйчүүдийн -73кг жинд Үндэсний шигшээ багийн тамирчин, Баянхонгор аймгийн Хүрээмарал сумын харьяат, ШШГЕГ-ын "Сүлд" спорт хорооны тамирчин, Сүхбаатарын одонт, ОУХМ Цэнд-Очирын Цогтбаатар аваргын алтан медаль хүртлээ. Харин эмэгтэйчүүдийн -57кг жинд Үндэсний шигшээ баг, “Сүлд” спорт хорооны тамирчин ОУХМ Лхагватогоогийн Энхрийлэн хүрэл медал хүртэв.
Т.Мөнхжаргал
