“Буриадын сан”, “Холун хатны үрс” ТББ-аас ОХУ-аас ирж буй халимаг, буриадуудад туслах аян эхлүүлэх талаар мэдээлж байна. Энэ үеэр Холун хатны үрс ТББ-ын тэргүүн А.Сарнай мэдээлэл өглөө.

Тэрбээр "Манай сангаас ОХУ-аас дүрвэж орж ирсэн хүмүүст тусламж үзүүлээд явж байна. Тусламж хэрэгтэй маш олон хүмүүс байна. Тиймээс өөрийн шавь нар болон, ОХУ-ыг төгссөн бизнес эрхлэгчдид, Герман хэл сургаад явуулсан шавь нараасаа тусламж хүсмээр байна. Монголын ард түмнээсээ хүсэх юм алга. Би 2014 оноос хойш ямар ч амралтгүй ажилладаг. Тусламж хэрэгтэй хүмүүст туслаж тайтгарал авдаг. Ном гаргаад, номоо зарж хандивын үйл ажиллагаандаа зарцуулж байсан. 

Бид мөнхийн хөршөөсөө хаашаа ч зайлахгүй. Тиймээс энэ хүмүүсийг Монгол Улсад байх хугацаанд нь туслах хэрэгтэй. Монголчуудын минь амьдрал хүнд байна. Тиймээс Монголчуудаасаа хандив хүсэх зүрх алга. Харин шавь нараасаа хандив хүсэж байна. Багш нь ганцаараа дийлэхгүй байна. 

Дүрвэж орж ирсэн Оросуудад дулаан хувцас хэрэгтэй байна. Өмссөн хувцастайгаа ороод ирсэн хүмүүс их байна. Хонох газар байхгүй. Байсан мөнгөөрөө зочид буудалд хоносоор байгаад одоо хонох газаргүй, мөнгөгүй болсон байна. Бид гурван буриад хүнд  ажил олж өгсөн. Мөн дулаан куртик өгсөн. Хоёр хоёроор нь оруулах хоёр өрөө байр олсон. Би өөрөө орос хэлгүй учир орчуулагч ажилд авсан” гэв. 

Д.Батчулуун