ЭМЯ, ХӨСҮТ, Томуугийн Үндэсний Төвөөс томуу, коронавируст халдварын харуулдан тандалтыг бэхжүүлэх, салбар хоорондын оролцоог нэмэгдүүлэх зорилгоор “Томуугийн үндэсний аравдугаар зөвлөгөөн”-ийг зохион байгуулж байна. Энэ үеэр ХӨСҮТ–ийн Ерөнхий захирал Ц.Билэгтсайхан үг хэллээ.

Тэрбээр "Томуугийн үндэсний аравдугаар зөвлөгөөнд оролцож буй зочид төлөөлөгчид, оролцогчид та бүхэнд энэ өдрийн мэндийг хүргэе. Энэ удаагийн зөвлөгөөн олон салбарын мэргэжилтнүүдийн хамруулж, өргөн хүрээнд зохион байгуулж буйгаараа онцлог болж байна. Энэхүү зөвлөгөөнийг бид томуу, томуу төст өвчний нөхцөл байдлын өвчлөлийн цаашдын хандлага, эрүүл мэндийн болон бусад салбарт тулгарч болох хүндрэл бэрхшээлүүд, түүнийг хэрхэн сайжруулах арга замыг хэлэлцэх зорилгын хүрээнд зохион байгуулдаг уламжлалтай.

Манай улс ковид-19 цар тахлыг хохирол багатай даван туулж чадсан. Гэсэн ч томуу, томуу төст өвчний идэвхжил нэмэгдэж, эрүүл мэндийн салбарт ачаалал үүсгэх хандлагатай байна.

Түүнчлэн дэлхийн эрдэмтэн судлаачид томуугийн вирусийн шалтгаант цар тахал гарах магадлал өндөр байгааг тэмдэглэж байна. Иймээс бид цар тахалтай тэмцсэн үеийн алдаа оноогоо дүгнэн хэлэлцэж, цаашид болзошгүй цар тахлаас урьдчилан сэргийлэх, олж авсан мэдлэг туршлагадаа үндэслэн бэлэн байдлаа хангах, тогтвортой байдлыг ханган ажиллах, чадавхаа нэмэгдүүлэх шаардлага тулгарч байна. Бид энэхүү зөвлөгөөнөөрөө тулгамдсан асуудлыг нарийвчлан хэлэлцэж, санал санаачилга бүхий зөвлөмж гаргаж хэлэлцүүлэн ажиллах юм. Цар тахлаас урьдчилан сэргийлэх, тэмцэх арга хэмжээг гардан хэрэгжүүлж, өөрийн эрүүл мэнд, ар гэрээ умартан зүтгэж ирсэн эрүүл мэндийн байгууллагын нийт ажилтан болон бидэнтэй мөр зэрэгцэн хамтран ажиллаж ирсэн цагдаа, тагнуул, мэргэжлийн хяналт, хилийн цэрэг зэрэг бүх байгууллагуудад талархал илэрхийлье” гэв.

Д.Батчулуун