Үндсэн хуулийн дугуйлан төслийн талаар Иргэдийн шударга шүүх ТББ-аас мэдээлэл хийлээ. 

Мэдээлэлдээ "Үндсэн хуулийн тухай сургалт хийгээд гурван жил явж байна. Энэ хугацаанд хүмүүс үндсэн хуулиас зугтаагаад яваад байна. Хуулийг өөртөө ашигтайгаар хэрэглэх зүйл байхгүй байна. Хууль гэдэг зүйл бидний өмсөөд сууж буй хувцас шиг хэрэглээ болох ёстой. Тиймээс онолын эрхзүй гэдэг ойлголтоос хэрэглээний эрхзүй гэдэг ойлголтыг бий болгоё.

800, 900 хууль гэж яриад байгаа. Энэ бүх хуулийг иргэд нь мэдээд, амьдралаа дээшлүүлэхийн тулд хэрэглэдэг байх хэрэгтэй. Энэ соёлыг бий болгохын тулд үндсэн хуулийн сургалтыг явуулж ирсэн. Нэг ёсондоо гоё хувцас хийчхээд, энэ томчихсон байна, багадчихаж гээд хоорондоо хэрэлдээд байгаа.

Өнөөдөр тогтолцоо гэж ярих хүмүүс их болсон. Үндсэн хууль дотор маш олон тогтолцоо бий. Бүх салбарын тогтолцоо уялдаатай зөв хөгжиж байж Монгол Улсын нийгмийн хөгжил зөв тодорхойлогдоно. Монгол Улсыг ямар байлгахын Монголын ард түмэн шийддэг нийгэмд амьдарч байна. Үндсэн хууль “Монголын ард түмэн бид...” гэж эхэлдэг.  Монголын ард түмэн бид гэдэгт та , бид орж байгаа эсэхийг асуумаар байна. Төрийн албан хаагчид үндсэн хуулийн мэдлэг маш муу. Өнгөрсөн хугацаанд хууль сурталчлах ажлыг хийгээгүй биш хийсэн. Төрийн зүгээс хийж байсан. Одоо хүртэл “Эрх зүйн хөтөч” хөтөлбөр хэрэгжээд явж байна. Төрийн албанд худлаа тайлан гаргадаг хүмүүс их байна. Орон нутгийн нийгмийн ухааны багш нарыг үндсэн хуулийн сургагч багш болгох, цагдаагийн алба хаагч нарын мөн бэлтгэх зэрэг ажлыг хийхээр төлөвлөж байна. Үндсэн хуулийн дугуйлант төслийн нээлт арваннэгдүгээр сарын 26-нд болно. УИХ-аас тогтоол гаргаж өгөхийг хүссэн. УИХ болон Ерөнхийлөгчийн тамгын газар зөвшөөрсөн" гэв. 

Д.Батчулуун