“Өргөө” амаржих газрын хууль бус үйл ажиллагаатай холбоотойгоор Эрүүл мэндийн ажилтны Үйлдвэрчний эвлэлийн хорооноос мэдээллээ.

Үйлдвэрчний эвлэлийн хорооны зүгээс "Эрүүл мэндийн салбарын зарим байгууллагад ажлын байрны дарамт шахалт гарах болсон. Энэ талаар өргөдөл, гомдол ирүүлсэн эмч, ажилтнуудын асуудлыг шийдвэрлэхээр Эрүүл мэндийн яамд удаа дараа хандсан боловч асуудал шийдэгдээгүй өдийг хүрээд байна. Дээрх асуудал бол дан ганц “Өргөө” амаржихтай холбоотой биш. Бидэнд мэдэгдсэн нь энэ болохоос биш, мэдээгдээгүй нь олон бий. Ёс зүйн хороо болон бусад дүгнэлт гарчихсан. Тиймээс энэ асуудлыг шийдвэрлэж өгөөч, хэрэв асуудлаа шийдэхгүй бол сайдын суудлаасаа огцор хэмээн шаардаж байна.

2021-2022 онд “Өргөө” амаржих газраас 138 хүн ажлаас халагдсан байна. Гэтэл уг байгууллага 487 ажилчинтай. Нийт ажилчдынхаа 30 орчим хувийг халсан. Ж.Энхцэцэг захирал ажилчдынхаа 15 хувийг халахад асуудалгүй хэмээн хэвлэлд ярьж байна.

Гэтэл баталгаатай ажлын байраар хангаж, эмнэлгийн тусламж үйлчилгээг нарийн мэргэжлийн түвшинд хүргэх ёстой болохоос биш нэг ч хүнийг халах ёсгүй. Эрүүл мэндийн яамны эмнэлгийн ажилтны ёс зүйн хяналтын хорооноос гаргасан дүгнэлтээр “Өргөө” амаржих газрын захирал Ж.Энхцэцэгийг ёс зүйн зургаан заалтыг зөрчсөн гэж үзсэн. Мөн Эрүүл мэндийн яамны аудитын газраас, Өргөө амаржих газрын хүний нөөцийн үйл ажиллагаа алдагдсан, удирдах болон бусад ажилчдын сонгон шалгаруулалтын журмын хэрэгжилт хангалтгүй, байгууллагын удирдлагын баг тогтворгүй, эрүүл мэндийн чиглэлээр мэргэшээгүй, Засгийн газрын тогтоолоор баталсан журмыг хангаагүй хүнийг удирдлагын багт томилсон зэрэг асуудлыг тогтоосон. Улмаар байгууллагын үйлдвэрчний эвлэлийн хороонд албан бичгээр ирүүлсэн. Гэвч өнөөдрийг хүртэл энэ асуудал шийдэгдээгүй. Энэ хуралд “Өргөө” амаржих газрын ажилчдын төлөөлөл оролцох байсан ч ирсэнгүй, байгууллагын зүгээс оролцуулаагүй байна” гэв.

М.Сүхэхэй