Узбекистаны нийслэл Ташкент хотод зохиогдсон жүдо бөхийн ДАШТ-д манай улсаас Үндэсний шигшээ багийн ахлах дасгалжуулагч Х.Болдбаатарын удирдлага 18 жүдоч өрсөлдөж, алт, мөнгө, хүрэл медаль хүртэж, багийн дүнгээр дөрөвдүгээр байрт жагссан юм. 

Энэхүү тэмцээнд амжилттай оролцсон баг тамирчин, дасгалжуулагчдыг Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ, Биеийн тамир, спортын улсын хорооны дарга Д.Жаргалсайхан нар хүлээн авч уулзлаа.  

Уулзалтаар ДАШТ-ээс медаль хүртсэн Ц.Цогтбаатар, Э.Ариунболд, Л.Энхрийлэн нарыг Биеийн тамир, спортын Тэргүүний ажилтан цол тэмдгээр шагнаж урамшууллаа. 

Энэ үеэр ДАШТ-ий хүрэл медальт ОУХМ Л.Энхрийлэн "Дэлхийн медальтан болсондоо маш их баяртай байна. Тухайн үедээ итгэж чадахгүй өөрийн эрхгүй уйлчихсан. Хүрэл медалийн төлөөх барилдаан ялахгүй л бол болохгүй барилдаан байсан. Ялагдвал үзэгчийн эгнээ рүү шилжих байсан. Тиймээс бүхнээ зориулаад гурван торгуулаар ялсан.

Би өөрөө их цоглог хүн учир дэвжээнд гарахын өмнө эрч хүчтэй дуу сонсдог. Хүрэл медалийн төлөөх барилдаанд сэтгэл зүй маш тогтвортой, ялна гэсэн бодолтой байсан.

2023 оны ДАШТ-ий аварга болох зорилготой. Мөн 2024 оны Парисын олимпид оролцож, Монголын анхны эмэгтэй Олимпын аварга болохыг хүсэж байна” гэв. 

Д.Батчулуун