Монгол Улс уг нь цас мөсний орон. Гэсэн ч өвлийн спортын тамирчид болон сонирхогчид бэлтгэл сургуулилтаа хийх зориулалтын газар байхгүй шахам. Харин өнгөрсөн жил Мөсөн өргөө болон Чингэлтэй дүүргийн мөсөн ордон ашиглалтад орсон. Ийнхүү хоёр мөсөн гулгуурын талбайтай болсноор өвлийн спортыг сонирхох хүмүүс их болжээ. Тухайлбал, өнгөрсөн долоо хоногт Чингэлтэй дүүргийн спортын хорооны Мөсөн ордон нээлтээ хийж, хэд хэдэн клуб хичээллээд эхэлсэн байна. Үйл ажиллагаа явуулж эхэлснээр олон нийт гэр бүлээрээ цагийг зугаатай өнгөрөөх, өвлийн спорт сонирхогчид ирж хичээллэх, тамирчид бэлтгэл сургуулилтаа хийх боломж нээгдэж байгаа юм. Ийнхүү уншигч та бүхэнд Чингэлтэй дүүргийн спорт хорооны Мөсөн ордноос бэлтгэсэн сурвалжилгыг хүргэж байна.
ОУХМ, Ж.Баярсайхантай ярилцлаа. Тэрбээр Хоккейн спортоор хичээллээд 25 жил болж буй. Одоогоор үндэсний шигшээ багтаа тоглохын зэрэгцээ Чингэлтэй дүүргийн спорт хорооны Хоккейн клубын багшаар ажиллаж буй юм.
-Мөсөн ордон нээлтээ хийгээд долоо хоног өнгөрчээ. Клубуудын үйл ажиллагаа жигдэрсэн үү?
-Нээлт хийснээс хойш долоо, найман клуб гэрээ хийх санал тавьсан. Одоогоор хүүхдийн хоккейн гурван клуб бэлтгэл сургуулилтаа тогтмол хийгээд эхэлсэн. Мөн насанд хүрэгчдийн багууд бэлтгэлээ хийж байна. Хоккейн клубуудын цомын тэмцээн болоод удаагүй байна. Гэсэн ч өсвөр үе, залуучууд, идэрчүүд зэрэг насны ангиллаар бэлтгэл сургуулилтаа хийгээд эхэлсэн.
-Хоккейн спортоор хүүхдүүд хэдэн наснаас эхэлж хичээллэж байна вэ?
-Одоогоор хамгийн баг хүүхдүүд нь таван настай. Хэдэн наснаас ч эхэлж хичээллэх боломжтой. Гэхдээ бага наснаас эхлээд хичээллэвэл үр дүн сайн гардаг. Манай клубт хоёр багш багшилж байна. Нийт таван хүний бүрэлдэхүүнтэй ажиллаж байна.
-Энэхүү мөсөн ордны мөсийг өнгөрсөн жил ОХУ-ын мэргэжилтнүүд ирж тавьсан юм билээ. Энэ жил өөрсдөө тавьсан уу?
-Тийм ээ. ОХУ-ын мэргэжилтнүүд буюу тендерт ялсан ОХУ-ын компани ирж мөсийг тавиад, байгууламжийг бий болгосон. Одоогийн байдлаар Монголчууд дагалдангаар яваад, суралцаад өөрсдөө тавьдаг болсон. Тавьж буй хиймэл мөсийг хүмүүс натурал мөснөөс их өөр гэж ойлгодог. Тийм ч их ялгаатай биш. Мөсний чанар натурал мөснөөс илүү гулгамтгай чанартай, чанарын өндөр түвшинд нягтшил ихтэй байдаг. Мөн температур арай бага, заал танхимд бий учир дулаахан байдаг.
-Чингилтэй дүүргийн гэдэг утгаараа зөвхөн Чингэлтэйчүүд ирэх боломжтой гэх ойлголт байж магадгүй юм. Ер нь дүүрэг хамаарах уу?
-Дүүрэг хамаарахгүй. Өвлийн спорт хөгжүүлэхийн төлөө байгуулагдсан тул бүх хүнд нээлттэй. Мөн энэхүү цогцолбор ард түмний хөрөнгөөр боссон шүү дээ.
-Цаашид олон нийтийг хамарсан ямар үйл ажиллагаанууд явуулах вэ?
-Аль болох өвлийн спортын төрлөөр үйл ажиллагаа явуулна. Мөн нийтийн гулгалтыг байнга явуулна. Учир гэвэл энэ ордон маань өртөг өндөртэй байдаг. Тухайлбал, тогны зардал зэрэг зардлууд нь 30 орчим сая төгрөг гардаг. Тиймээс нийтийн гулгалтыг байнга зохион байгуулна. Ер нь Хоккей бол их элит спорт юм.
-Чингэлтэй дүүргийн спорт хорооны техникч Ж.Хуяг: Манай улсад мөсөн ордны техникч мэргэжилтэй хоёрхон хүн бий-
-Танд энэ өдрийн мэндийг хүргэе. Та өөрийгөө танилцуулахгүй юу?
-Би Чингилтэй дүүргийн спорт хорооны Мөсөн гулгуурын талбайн техникчээр ажиллаж байна. Монголд төрийн төсвөөр баригдсан хамгийн анхны бүтээл бол энэхүү мөсөн гулгуурын талбай юм. Мөсөн гулгуурын талбайн цэвэрлэгээ, арчилгаа зэрэг бүх үйл ажиллагааг энэхүү машинаар хийж байна. Миний хувьд Солонгос улсад мөсөн гулгуурын талбай дээр энэ чиглэлээрээ ажиллаж байсан. Тийм учраас энэхүү байгууллагт мэргэжлээрээ ажиллахаар болсон.
-Энэхүү талбайг хэдэн минутад цэвэрлэдэг вэ? Мөн машиныхаа тухай мэдээлэл өгөөч?
-Талбайг 15 минутын дотор буюу нэг удаагийн үйлдлээрээ цасаа хусна, цэвэрлэнэ, өнгөлөх зэрэг үйлдлийг хийдэг. Монголд ийм машин гурав бий. Нөгөө хоёр нь Мөсөн өргөөд бий. Мөсөн өргөөд байгаа хоёр машины хувьд манай машиныг бодвол хүчин чадал өндөртэй, сүүлийн үеийн машинууд бий.
-Өдөрт хэчнээн удаа цэвэрлэдэг вэ?
-Тухайн өдрийн үйл ажиллагаанаас шалтгаалдаг. Хоккейн бэлтгэл дууссаны дараа цэвэрлэдэг. Тухайлбал, нэгээс хоёр цаг тутамд байнгын цэвэрлэгээтэй байдаг. Арван удаагийн бэлтгэл орвол арван удаа цэвэрлэхэд ч бэлэн байдаг.
-Мөсөн гулгуурын техникч мэргэжил эзэмшсэн мэргэжилтэн цөөхөн бий гэж дуулсан. Одоогоор Монгол Улсад хэдэн мэргэжилтэн байна вэ?
-Тийм ээ. Одоогоор Монгол Улсад хоёр бий. Нэг нь Мөсөн өргөөд ажиллаж байна.
-Таныг Мөсөн өргөөний техникчид зааж сургасан гэж сонслоо. Ер нь танд энэ чиглэлээр мэргэжилтэн бэлтгэх, зааж сургаач хэмээн хүсэлт ирж байв уу?
- Тийм ээ. Би энэ чиглэлээр Солонгос улсад ажиллаж байсан туршлагаасаа хуваалцдаг. Өнгөрсөн жил Мөсөн өргөөд ажиллах санал ирсэн. Гэсэн ч би энд ажиллахыг сонгосон.
-Нээлтээ хийснээс хойш хүмүүс их ирж байна уу? Тамирчид нь бэлтгэлээ хийгээд эхэлсэн үү?
-Мөсөн гулгуурын талбай жилийн дөрвөн улиралд мөстэй байна гэдэг ойлголт Монголчуудын хувьд мөрөөдөл байсан. Тэр маань биелсэн. Энэхүү Чингэлтэй дүүргийн мөсөн гулгуурын талбай нээлтээ хийгээд удаагүй. Гэсэн ч Улаанбаатарчууд маань ирсээр байна. Мөн хоккей, тэшүүрийн багийн тамирчид бэлтгэлээ хийгээд эхэлсэн байна.
Д.Батчулуун
