Даян дэлхийн "Нэр төрөө эрхэмлэх өдөр" өнөөдөр тохиож буй. Энэхүү өдрийг тохиолдуулан Туул Ротаракт клубээс сурагчид, оюутнуудыг хамруулсан лекцийн арга хэмжээг зохион байгууллаа. Тус клуб энэхүү арга хэмжээг 2013 оноос эхлэн зохион байгуулж байгаа юм.
Харин өнөөдрийн арга хэмжээг ээж клуб болох Туул Ротаритайгаа хамтран зохион байгуулав. Үүнд есөн дүүргийн 28 сургуулийн ахлах ангийн сурагчид хамрагдлаа.
Энэ удаа “Мэдлэг-Ур чадвар-Хандлага-Дадал”, “Өөрийгөө удирдах чадвар”, “Том мөрөөд”, “Өөртөө итгэ” гэсэн үндсэн дөрвөн сэдвийн хүрээнд зохион байгуулагдлаа.
Уг лекцийн лектороор:
- Монгол Улсын 27 дахь Ерөнхий сайд, УИХ-ын гишүүн, Туул ротари клубын үүсгэн байгуулагч Н.Алтанхуяг,
- “Мандал даатгал” компанийн үүсгэн байгуулагч Ө.Ганзориг,
- “ELF education”-ийн үүсгэн байгуулагч Б.Батжин
- Реппер Б.Гантулга буюу Sekstsagaanbogd оролцож, өөрсдийн илтгэлээ танилцуулсан юм.
Тус лекцийг зохион байгуулж, ирээдүй хойч үеийнхэндээ урам зориг өгч буй “Ротари” клуб бол сайн сайхан нийгмийг бий болгох зорилготой эвлэлдэн нэгдсэн бизнесийн болон мэргэжлийн шилдэгүүдээр хүрээллээ бүрдүүлж, дэлхийн өнцөг булан бүрд хүрч ажилладаг олон улсын төрийн бус хүмүүнлэгийн байгууллага юм.
Харин "Туул Ротари" клуб нь 2004 оны хоёрдугаар сарын 23-ны өдөр Ротари хөдөлгөөний 99 жилийн ойн өдөр байгуулагджээ. Анх байгуулагдсан цагаасаа хойш нийгмийн сайн сайхны төлөө хүмүүнлэгийн олон арван төслийг гадаадын эгч дүү Клубуудтэй хамтран хэрэгжүүлж, Ротари хөдөлгөөнийг Монгол Улсдаа таниулахад ихээхэн үүрэг гүйцэтгэж иржээ.
Сэтгэгдэл (3)