2008 оны долоодугаар сарын 1-нд хохирсон хүмүүсийн ар гэрийн төлөөллүүд мэдээлэл хийж байна.

Мэдээлэлдээ “2008 оны долоодугаар сарын 1-ны өдөр Монголын иргэд, цагдаа нарын хооронд маш том мөргөлдөөн болсон. 1937 оноос хойш төр нь иргэд рүүгээ буу шагайж байгаагүй үзэгдэл болсон. Албан шаардлагын гол агуулга бол сонгуулийн дүнг эсэргүүцэн жагсаал цуглаан болсон. Тайван замаар эхэлсэн жагсаал цуглаан мөргөлдөөн болон хувирсан. Эцэстээ дөрвөн залуу буудуулж, нэг залуу галд шатаж нас барсан. Мөн насан туршдаа тахир дутуу болсон олон хүн бий. Тухайн үеийн ерөнхийлөгч, ерөнхий сайд, хууль зүйн сайд нь гарч ирээд уучлал гуйж нөхцөл байдлыг зөөлрүүлээгүй.

Эцэст нь 800 гаруй иргэд яллагдагч, сэжигтнээр татагдсан. Үүнээс 200 гаруй залуу ял шийтгэл авсан байдаг. Жагсаал цуглаанд оролцсон, үзэл бодлоо илэрхийлсэн, ажил үүргээ гүйцэтгэж байсан алба хаагчид хохироод үлдсэн. Цагдаагийн ажилтнуудыг зэвсэг хэрэглэн иргэдийн амь насыг хохироосон хэмээн цагдаагийн алба хаагчдад хариуцлага хүлээлгэсэн.

Харин үймээний үед цагдаа иргэдийг буудаагүй, буудсан бол би хариуцлага хүлээлгэнэ хэмээн С.Баяр, Ц.Мөнх-Оргил, Ц.Элбэгдорж, О.Магнай, Х.Батзандан нарын хүмүүс хариуцлагатай хэлж байсан. Харин тэд ямар ч хариуцлага хүлээгээгүй өнөөдрийг хүртэл явсан байна. Иймд дээр дурдсан этгээдүүд болон тухайн үед өндөр албан тушаал хашиж байсан бусад этгээдүүдэд гэм буруу байгаа эсэх, гэм буруу байгаа бол түүнийг тогтоож зохих хууль зүйн хариуцлага хүлээлгэхийг шаардаж байна гэсэн шаардлагыг Ерөнхий прокурорын газар, Цагдаагийн байгууллага, Авлигатай тэмцэх газарт хүргүүлж байна” гэв.

Д.Батчулуун