Дархан хотын “Оюуны ирээдүй” цогцолбор сургуулийн цайны газраас үл мэдэх газ ялгарсны улмаас сургуулийн багш, болон сурагчид эмнэлэгт хүргэгдээд байгаа тухай тус хотын DBS телевиз мэдээллээ. Сургуулийн хүүхдүүд “Хичээл орж байхад багш бүгд гараарай гэж хэлсэн. Сургууль дотор хий тарсан юм шиг байна лээ. Ханиалгаж , хоолой өвдөж байна” хэмээн ярьжээ.

Сургуулийн захирал н.Нарантуяа “Хүүхдүүд цайны газрын үүдээр юм шидсэн. Тэгээд ажилчид болон хүүхдүүд угаартсан байна” хэмээн ярилаа.

Цайны газрын ажилчдын ярьж байгаагаар газ дэлбэрээгүй, хүүхдүүд үл мэдэх зүйл сургуулийн цайны газрын хаалгаар шидсэн байна. Улмаар нэг давхарт байсан хүүхэд болон ажилчдын хоолой боогдож, хордлогод орсон байдалтай эмнэлэгт хүргэгдээд байгаагаас цайны газрын нэг ажилтан эрчимт эмчилгээний тасагт шилжсэн ажээ.

Харин эцэг эхчүүдийн зүгээс “Хүүхдүүд юм шидсэн байх боломжгүй. Тоглоомоор хийсэн байсан ч хордох хэмжээнд хүргэхгүй. Харин энэ зүйл сургуулийн химийн лабораториос ялгарсан байхыг үгүйсгэхгүй” гэж ярилаа. Эмчийн хэлснээр 20 гаруй хүүхэд эмнэлэгт хүргэгдэн ирээд байгаа юм. Тухайн сургууль дээр одоогоор Онцгой байдлын газрын ажилчид шуурхай ажиллаж байна. 

Л.Сайнаа