ХӨСҮТ-ээс коронавирусын шинэ хувилбар бүртгэгдсэн талаар мэдээлэл хйиж байна. Энэ үеэр ХӨСҮТ-ийн захирал Ц.Билэгтсайхан мэдээлэл хийлээ.

Тэрбээр "Олон Улсын BA5.1, 5.2, BQ1, 1.2, XBB гэдэг шинэ хувилбарууд тодорхойлогдож байна. Олон улсад, ялангуяа урд хойд хөрш болон Япон, Солонгос зэрэг улсуудад ковид-19 цар тахал нэмэгдэж байна. Харин манай улсад 44 дүгээр долоо хоногт коронавирусын 772 тохиолдол бүртгэгдсэн. Өнгөрсөн долоо хоногт 357 байсан. Өөрөөр хэлбэл, хоёр дахин өссөн байна. PCR-ийн эзлэх хувь хоёр дахин өссөн байна. Тандалтын үзүүлэлтүүдийг дагаад эмнэлгийн тусламж үйлчилгээний ачаалал сүүлийн хоёр долоо хоногт нэмэгдсэн. Тухайлбал, 342 хүн улс даяар эмчлэгдэж байна. 225 хүн ХӨСҮТ дээр эмчлэгдэж байна.

Бид ямар төрлийн вирусээр өвдөж байна вэ гэдгийг тодорхойлдог. Өмнө нь тодорхойлогдож байсан хувилбарууд тодорхойлогдсон. Харин өмнө нь илэрч байгаагүй Омикроны хоёр хувилбар шинээр бүртгэгдсэн.

Тухайлбал, сорьцоос BF7, BQ1.2 гэх хувилбар тодорхойлогдсон байна.

BF7 хувилбар нэг хүнд тодорхойлогдсон. Энэ хүн бол БНХАУ-ын иргэн. ОХУ-д ажиллаж байгаад манай улсад ирсэн. Одоогоор биеийн байдал хэвийн. Зочид буудалд тусгаарлагдан эмчилгээ авч байна.

BQ1.2 таван хүнд тодорхойлогдсон. Эдгээр таван тохиолдлоор манай улсын иргэд өвдсөн. Хоёр нь эмнэлэгт хэвтэн эмчлүүлж байна. Харин үлдсэн гурван хүн гэрээр эмчилгээ хийлгэж байна. Энэхүү хувилбар халуурах, хоолой сэрвэгэнэх, хөндүүрлэх зэрэг эмнэлзүйн шинжүүд давамгайлж байгаа юм. Иймд иргэд амны хаалтаа зүүх, гараа угаах, хүн хоорондын зай барих дэглэмээ баримтлах нь чухал байна" гэв. 

Д.Батчулуун