Их Эзэн Чингис хааны мэндэлсэн өдөр буюу Монгол бахархлын өдөр ирэх пүрэв гарагт тохионо. Уламжлалын дагуу гардуулдаг Төрийн дээд, тэргүүн зэргийн “Чингис” хаан одонгоор хэн энгэрээ мялаах бол гэх хүлээлт олон нийтийн дунд үүсчээ.
Тухайлбал, энэ долоо хоногоос эхлэн Б.Болдсайхан эмчид “Чингис хаан” одонг гардуулна” гэх ташаа мэдээлэл олон нийтийн сүлжээнд цацагдсан билээ. Үүнтэй холбогдуулан Ерөнхийлөгчийн тамгын газрын Хэвлэл мэдээлэл, олон нийттэй харилцах албанаас "Ирэх долоо хоногт “Чингис хаан” одонг хэнд олгохыг зарлана. Нууцын зэрэглэлд байгаа учраас одоогийн байдлаар уг одонг хэнд олгох нь тодорхойгүй. Тодорхой болсон цагт Ерөнхийлөгчийн тамгын газрын дарга олон нийтэд зарладаг журамтай” гэсэн юм. Ийнхүү “Чингис хаан” одонг хэн хүртэх нь таамаг төдий байна.
Чингис хаан одонг 2005 оноос олгож эхэлсэн бөгөөд жил бүр нэг хүнийг энэхүү одонгоор шагнадаг. Харин 2018, 2020 онуудад Чингис хаан одонг олгоогүй юм. Мөн 2021 онд хоёр хүн олгосон юм. Ийнхүү уншигч та бүхэнд 2005 оноос хойш Чингис хаан одонгоор энгэрээ мялаасан эрхэмүүдийг танилцуулж байна.
- 2005 он: Монгол Улсын анхны Ерөнхийлөгч Пунсалмаагийн Очирбат
- 2006 он: Төрийн шагналт хөгжмийн зохиолч Бямбасүрэнгийн Шарав
- 2009 он: Монгол Улсын Ерөнхий сайд асан Дашийн Бямбасүрэн
- 2010 он: Төр, нийгмийн зүтгэлтэн Раднаасүмбэрэлийн Гончигдорж
- 2011 он: Монгол Улсын Ерөнхийлөгч асан Нацагийн Багабанди
- 2012 он: УИХ-ын гишүүн асан Дамдины Дэмбэрэл
- 2013 он: Монгол Улсын Ерөнхий сайд асан Думаагийн Содном
- 2014 он: Нэрт эрдэмтэн, физикч Хавтгайн Намсрай
- 2015 он: Соёлын гавьяат зүтгэлтэн, нэрт зохиолч, яруу найрагч Гомбожавын Мэнд-Ооёо
- 2016 он: Гавьяат жүжигчин, дуурийн дуулаач Ганбаатарын Ариунбаатар
- 2017 он: Гавьяат тамирчин, Монгол улсын хөдөлмөрийн баатар олимпын аварга Найдангийн Түвшинбаяр
- 2019 он: Хүннү рок урсгалаар тоглодог “Хү” хамтлаг
- 2021 он: Монголын анхны сансрын нисгэгч, Монгол Улсын баатар, хошууч генерал Жүгдэрдэмидийн Гүррагчаа
- 2021 он: Монгол Улсын Зэвсэгт хүчний бие бүрэлдэхүүн.
Мөн тус одонг хүртсэн эрхэмүүдэд дараах урамшууллыг олгодог
- Одон хүртэгч Монгол Улсын иргэнд тухайн үеийн ханшаар 9 цэн алттай тэнцэх хэмжээний мөнгөн шагнал, гадаадын иргэнд мөн тухайн үеийн ханшаар 9 цэн алттай тэнцэх хэмжээний мөнгөн шагнал эсвэл түүнтэй дүйцэх дурсгалын зүйлийг олгоно.
- Эл одонгоор шагнагдсан Монгол Улсын иргэн “Чингис хаан” одонг гардуулах ёслолын ажиллагаа, Үндэсний их баяр наадам, Үндсэн хуулийн өдөр, Цагаан сарын баярыг тохиолдуулан зохион байгуулах төрийн ёслолын арга хэмжээнд уригддаг.
- Мөн Монгол Улсын иргэнд Их Эзэн Чингис хааны өдөр буюу Их Эзэн Чингис хаан мэндэлсэн билгийн тооллын өвлийн тэргүүн сарын шинийн 1-ний өдөр Монгол Улсын Ерөнхийлөгчийн гарын бэлэг өгдөг.
- Одонгоор шагнагдсан Монгол Улсын иргэн нь Монгол Улсын Ерөнхийлөгчийн гадаад улсад хийх албан ёсны айлчлалын бүрэлдэхүүнд багтах эрхтэй.
Д.Батчулуун
