Иргэний нийгмийн байгууллагууд Байгалийн нөөц ашиглалтын төлбөрийн хууль зөрчсөн аймаг, нийслэлийн удирдлагуудад сануулга өгч шүүхэд гомдол гаргах болсон талаар болон Сэлбэ голын эхэнд бүтээн байгуулалт нэрээр өгсөн гэрээний талаар мэдээлэл хийлээ. Энэ үеэр Иргэний нийгэмлэгийн байгууллагын гишүүн н.Эрдэнэцолмон мэдээлэл өглөө.

Тэрбээр “Монгол Улсын газар нутаг, баялаг, төрийн хамгаалалтад байна гэж Үндсэн хуульд заасан. Төр хамгаалахдаа төсөв гаргаж, менежментээ хэрэгжүүлэх ёстой байдаг. Гэтэл бодит байдал дээр хууль хангалттай түвшинд явахгүй байгаа ба улсын түвшинд уг хууль 20-30 хувийн гүйцэтгэлтэй байгаа. Бид байгалийн баялгийг авч ашиглаж чадаж байна. Тодорхой хэмжээнд төлбөр хураамж явагддаг. Буцаагаад байгалийн нөөцдөө захиран зарцуулах арга хэмжээ дутагдалтай байгаа. Орон нутгийн түвшинд байгаа байгалийн нөөц ашигласны төлбөрийн орлогыг зөв зүйлд нь буцааж зарцуулах шаардлагатай байна.

Байгалийн нөөц ашигласны төлбөрийн тухай хууль 2012 онд батлагдаад, үүнээс хойших 10 жилийн хугацаанд 200 орчим тэрбум төгрөгийн алдагдал хүлээсэн байна.Өөрөөр хэлбэл энэ 300 орчим сая модыг ойжуулалт, нөхөн сэргээлтэд хийх хэмжээний зардал мөнгийг шамшигдуулсан.

Нөгөө талаас тэрбум мод хөдөлгөөн, ногоон хөгжил ярьж буй энэ цаг үед үр дүнтэй буюу тухайлбал ойгоос олсон орлогыг тухайн ойгоо нөхөн сэргээхэд, газар ашигласны төлбөрөөс олсон орлогоо газраа нөхөн сэргээхэд зарцуулах юм бол манай байгаль орчны салбар хангалттай төсөв мөнгөтэй. Иймд аймгийн Засаг дарга, ИТХ-ынхан болон сумын Засаг дарга нар  Байгалийн нөөцийг ашигласан төлбөрийн тухай хуулиа хэрэгжүүлэхийг шаардаж байна" гэв.