1072 хувьцаа эзэмшигчдийн төлөөлөл цаг үеийн асуудалтай холбоотойгоор мэдээлэл хийлээ. Энэ үеэр 1072 хувьцаа эзэмшигч иргэн Ц.Бээжин мэдээлэл өглөө. 

Тэрбээр “Хувьцаа эзэмшигч иргэд төлөөлөн удирдах зөвлөлөөс бүх шийдвэрүүдийг бичгээр гаргуулан авах эрхтэй гэх хуулийн заалтыг үндэслэж, нүүрсний хулгайтай холбоотой 21 офтэйк гэрээг байгуулах зөвшөөрөл олгосон төлөөлөн удирдах зөвлөлийн бүх шийдвэрүүдийг бичгээр гаргуулан авах шаардлагыг ЭТТ компанийн бүрэн эрхт төлөөлөгч н.Ганбатад тавьж байна.

Компанийн тухай хуульд компанийн өдөр тутмын үйл ажиллагааг гүйцэтгэх удирдлагын баг хариуцан ажиллаж болно. Хоёрт, хувь хүн хариуцан ажиллаж болно гэж заасан.

Тэгвэл ЭТТ компани төрийн 85%, гурван сая иргэний 15% хэмээх хосолмол өмчлөлийн компани учраас компанийн өдөр тутмын үйл ажиллагааг удирдах гүйцэтгэх удирдлагын багийг багийн бүтцээр ажиллуулах шийдвэрийг өнөөдөртөө багтаан гаргахыг Засгийн газарт шаардаж байна. Гүйцэтгэх удирдлагын багт гурван сая гаруй иргэний хувьцаа эзэмшигчийг төлөөлж ажиллах чадвартай, мэдлэгтэй, сэтгэлтэй иргэдийг урьж байна. Компани дээрээ ирж, өмчийнхөө төлөө ажиллахыг уриалж байна” гэв.